Fraksioni i biznesit në Partinë Kristiandemokrate të Gjermanisë (CDU), që përfaqëson ndërmarrjet e vogla dhe të mesme, ka propozuar që të hiqet e drejta ligjore për të punuar me orar të pjesshëm. Sipas këtij grupi, kush dëshiron të punojë më pak orë duhet të marrë leje të veçantë.
Tani për tani, çdo punonjës në ekonominë më të madhe të Europës ka të drejtë të punojë me orar të pjesshëm, një mundësi që përdoret shpesh nga gratë për kujdesin e fëmijëve ose të të moshuarve.
Ky propozim pritet të miratohet në konferencën e CDU-së në Stuttgart muajin tjetër dhe do të bëhet politikë zyrtare e partisë.
Ekzistojnë përjashtime për ata që rrisin fëmijë, kujdesen për të moshuar ose ndjekin trajnime profesionale. Por të tjerët që zgjedhin punë me orar të pjesshëm nuk do ta kenë më këtë mundësi.
Propozimi ka hasur kundërshtime brenda vetes partisë. Dennis Radtke, kreu i krahut social të CDU-së, tha se kufizimi i orarit të pjesshëm nuk është zgjidhja dhe shtoi se duhet përmirësuar kujdesi për fëmijët dhe të moshuarit, në vend që t’u mohohet e drejta punonjësve.
Sindikata e fuqishme e metalurgjisë IG Metall u shpreh se problemi nuk është dëshira për të punuar, por kushtet e papërshtatshme për ata që nuk mund të punojnë me kohë të plotë.
Sipas Institutit Gjerman për Hulumtime mbi Punësimin, rreth 40% e punonjësve në Gjermani punonin me orar të pjesshëm në 3-mujorin e tretë të 2025-ës, kryesisht në sektorët e shëndetësisë, arsimit dhe shërbimeve sociale. Nga këta, 76% janë gra.
OECD vuri në dukje vitin e kaluar se gratë dhe të moshuarit nuk janë të integruar mjaftueshëm në tregun e punës.