Kolegji i Posaçëm i Apelimit, KPA ka vendosur sot në 5 mars shkarkimin nga detyra të ish-kryeprokurorit të Vlorës, Aurel Zarka.
Trupi gjykues përbëhej nga kryesuesja Natasha Mulaj, relatorja Mimoza Tasi dhe anëtarët Albana Shtylla, Rezarta Schuetz dhe Sokol Çomo.
Në përfundim të shqyrtimit, u mor vendimi i përbashkët për të ndryshuar vendimin e Komisionit të Pavarur të Kualifikimit dhe për të larguar nga detyra subjektin e rivlerësimit, Aurel Zarka.
Njoftim vendimi:
Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Mimoza Tasi relatore, Albana Shtylla, Rezarta Schuetz, Sokol Çomo anëtarë, shpalli vendimin për çështjen (JR) 42/2024, datë 28.10.2024, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 779, datë 28.06.2024, për subjektin e rivlerësimit Aurel Zarka.
Në përfundim të gjykimit, trupi gjykues, bazuar në nenin 66, pika 1, shkronja “b” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Ndryshimin e vendimit nr. 779, datë 28.06.2024 të Komisionit të Pavarur të Kualifikimit dhe shkarkimin nga detyra të subjektit të rivlerësimit Aurel Zarka.
Ky vendim është përfundimtar dhe ka efekt të menjëhershëm.
U shpall sot, më datë 05.03.2026, në Tiranë.
Prokurori Zarka kishte marrë miratimin për vazhdimin e detyrës nga Komisioni i Pavarur i Kualifikimit, vetëm një muaj para se të arrestohej. Kjo, pasi para prangosjes, nuk ishte evidentuar asnjë problem ose shqetësim që mund të ndikonte në funksionimin e tij si prokuror.
Kujtojmë se Gjykata e Posaçme e ka dënuar me 4 vite burgim ish-kryeprokurorin e Vlorës, Aurel Zarka, ku në aplikim të gjykimit të shkurtuar iu kthye në 2 vite e 8 muaj. Gjithashtu iu hoq e drejta për ushtrimin e funksioneve publike për 5 vite.
Prokuroria e Posaçme e ka akuzuar ish-prokurorin se është përfshirë në korrupsion dhe ka ushtruar ndikim te kolegët e tij. Sipas SPAK, Aurel Zarka ka qenë përdorues i aplikacionit Sky Ecc. Bisedat e kryera aty dhe verifikmet e tjera, treguan se ai u korruptua për një çështje në Gjykatën e Vlorës.
Ish-prokurori akuzohet edhe se ka tentuar të korruptonte një kolegun e tij në Vlorë për të pushuar një hetim dhe në 3 raste të tjera, ushtroi ndikim të paligjshëm te kolegët e tij.
