Mediat ndërkombëtare raportojnë se presidenti amerikan Donald Trump miratoi planet e sulmit ndaj Iranit, por ende nuk ka marrë një vendim përfundimtar nëse do ta sulmojë vendin dhe do t’i bashkohej zyrtarisht fushatës ajrore të Izraelit.
“Kemi një plan për gjithçka, por do të shohim se çfarë do të ndodhë. Kemi rrugë për të bërë. Ata duhet ta kishin bërë marrëveshjen, 60 ditë biseduam për të, dhe në fund, vendosën të mos e bënin dhe tani dëshirojnë ta kishin bërë dhe duan të takohen. Por është, pak vonë për t’u takuar, por ata duan të vijnë në Shtëpinë e Bardhë. Kam një ide se çfarë do të bëj, por nuk e kam marrë ende vendimin përfundimtar. Do të doja ta merrja vendimin përfundimtar një sekondë para se të vijë koha, sepse gjërat ndryshojnë me luftën, mund të shkojë nga një ekstrem në tjetrin”, tha Donald Trump.
Sipas CBS Neës duke cituar një burim i lartë i inteligjencës dhe një zyrtar i Departamentit të Mbrojtjes shkruan se kreu i Shtëpisë së Bardhë po pret të shikoj nëse Irani do të pranonte një marrëveshje të minutës së fundit për t’i dhënë fund programit të tij bërthamor përpara se të vazhdonte me planet e sulmit.
Ndër të tjera ai po shqyrton një sulm amerikan ndaj bazës së Fordou , një objekt nëntokësor i pasurimit të uraniumit në Iran. Vetëm SHBA ka armatimin e duhur që mund t’i afrohet shkatërrimit të kësaj baze te fortifikuar.
Planet janë midis një sërë opsionesh që këshilltarët ushtarakë të presidentit diskutuan me të në Shtëpinë e Bardhë, megjithëse zyrtarët theksuan se nuk është marrë ende asnjë vendim perfundimtar.
Në fjalimin e së mërkurës, udhëheqësi suprem i Iranit Ajatollah Ali Khamenei iu kundërpërgjigj SHBA-së se “çdo ndërhyrje ushtarake amerikane” do të ishte e kushtueshme dhe se kombi iranian nuk do të dorëzohet”. Trump e shpërfilli refuzimin, duke i uruar Khameneit “fat të mbarë”, por përsëri nuk pranoi të zbulonte planet e tij. Lajmi se Trump mbështet planet e sulmeve u raportua për herë të parë nga Ëall Street Journal.
Pete Hegseth, sekretari i mbrojtjes i Trump para një komisioni të Senatit deklaroi se Pentagoni është i përgatitur të ekzekutonte çdo urdhër të dhënë nga Trump. Komentet e tij erdhën teksa forcat amerikane janë dislokuar në Lindjen e Mesme. Një aeroplanmbajtëse USS Nimitz është nga Azia Juglindore për t’u bashkuar me një grup tjetër sulmues të udhëhequr nga USS Carl Vinson, i cili ndodhet tashmë në Gjirin Persik.
Abbas Araghchi, ministri i jashtëm iranian, tha në një postim në rrjetet sociale se vendi i tij “deri më tani është hakmarrë vetëm kundër regjimit izraelit dhe jo ndaj atyre që po e ndihmojnë dhe e mbështesin atë”. Ndërsa përsëriti angazhimin e Iranit ndaj diplomacisë, ai tha gjithashtu se vendi i tij do të “vazhdojë të ushtrojë të drejtën e tij për vetëmbrojtje”.
Ndërkaq ministrat e jashtëm të Gjermanisë, Francës dhe Britanisë planifikojnë të zhvillojnë bisedime bërthamore me homologun e tyre iranian të premten në Gjenevë për t’i kërkuar Iranit të kthehet në tryezën e negociatave.