Policia e Mirditës ka goditur këtë të dielë, 5 tetor, një tjetër rast të kultivimit të bimëve narkotike, në kuadër të operacionit të gjerë antikanabis të koduar “Koordinata”, që po vijon në të gjithë vendin.
Gjatë kontrolleve të zhvilluara në territorin e fshatit Bisakë, njësia administrative Mirditë, u zbulua një parcelë me 22 bimë narkotike të dyshuara të llojit cannabis sativa, ndërsa u arrestua në flagrancë Gj. P., 51 vjeç, banues në të njëjtin fshat.
Sipas Policisë, i arrestuari u kap në momentin që po kujdesej për bimët e paligjshme.
“Gjatë operacionit u kap në flagrancë, duke u kujdesur për bimët narkotike që kishte kultivuar në një parcelë në fshatin Bisakë, një 51-vjeçar. Shërbimet e Komisariatit të Policisë Mirditë, si rezultat i kontrolleve në kuadër të planit operacional ‘Koordinata’, goditën një rast të kultivimit të bimëve narkotike.
Gjatë kontrollit të territorit, në fshatin Bisakë, njësia administrative Mirditë, u zbulua një parcelë me 22 bimë të dyshuara narkotike, të llojit cannabis sativa.
Autori i dyshuar, shtetasi Gj. P., 51 vjeç, banues në fshatin Bisakë, Mirditë, u kap në flagrancë duke u kujdesur për bimët narkotike.”, bën me dije Policia.
Bimët narkotike u asgjësuan me anë të djegies, ndërsa një pjesë e tyre u sekuestrua si provë materiale.
Materialet procedurale i janë referuar Prokurorisë për veprime të mëtejshme, ndërkohë që operacioni “Koordinata” vijon intensivisht në të gjithë vendin, me synimin për të goditur çdo rast të kultivimit të kanabisit.