Presidenti francez Emmanuel Macron kërkoi të shtunën të ndalohen dërgesat e armëve për Izraelin, i cili është kritikuar për kryerjen e operacionit të tij hakmarrës në Gaza.
“Unë mendoj se sot, prioriteti është që ne të kthehemi te një zgjidhje politike, që të ndalojmë dërgimin e armëve për të luftuar në Gaza”, i tha Macron transmetuesit France Inter, duke shtuar se Franca nuk po dërgonte asnjë armë në Izrael.
Deklaratat e Macron vijnë në një kohë kur ushtria izraelite ka treguar se do të zgjerojë operacionet e saj në fronte të shumta në përvjetorin e sulmit të 7 tetorit, duke përfshirë një hakmarrje “të rëndësishme dhe serioze” kundër Iranit për sulmin me raketa balistike në shkallë të gjerë të javës së kaluar ndaj Izraelit .
“Ushtria izraelite IDF po përgatit një përgjigje ndaj sulmit të paprecedentë dhe të paligjshëm iranian ndaj civilëve izraelitë dhe Izraelit”, tha zyrtari ushtarak në kushte anonimiteti pasi nuk ishte i autorizuar të fliste publikisht për këtë çështje.
Ndërsa Izraeli tha se po planifikonte përgjigjen e tij ndaj sulmeve raketore iraniane të së martës, të cilat goditën në ose pranë një numri bazash kryesore izraelite, presidenti amerikan, Joe Biden, u shpreh kundër sulmeve ndaj objekteve të naftës iraniane, një ditë pasi tha se Uashingtoni po “diskutonte” një veprim të tillë.