Izraeli e ka vendosur vizitën e Presidentit Donald Trump në Lindjen e Mesme javën e ardhshme si afat për një marrëveshje të re për pengjet dhe armëpushimin, me një operacion masiv tokësor që do të fillojë nëse nuk arrihet ndonjë marrëveshje.
Kështu kanë thënë zyrtarët izraelitë për Axios.
Kabineti i Sigurisë i Izraelit miratoi të dielën në mbrëmje një plan për të ripushtuar gradualisht të gjithë Gazën dhe për ta mbajtur atë për një kohë të pacaktuar nëse nuk arrihet ndonjë marrëveshje deri më 15 maj.
Planet për operacionin kërkojnë që Forcat e Mbrojtjes së Izraelit (IDF) të rrafshojnë çdo ndërtesë që mbetet në këmbë dhe të zhvendosin praktikisht të gjithë popullsinë prej 2 milionë banorësh në një “zonë të vetme humanitare”.
Alternativa ndaj qëndrimit në zonën humanitare është që palestinezët të largohen nga enklava “vullnetarisht” për në vende të tjera “në përputhje me vizionin e Presidentit Trump për Gazën”, ka thënë një zyrtar izraelit.
Largime të tilla vështirë se mund të konsiderohen vullnetare dhe asnjë vend nuk ka rënë dakord deri më tani të pranojë palestinezë të zhvendosur.
Zyrtarët izraelitë pretendojnë se ka negociata të vazhdueshme me disa vende në këtë front, tregon Axios.
Shumë zyrtarë izraelitë e shohin këtë operacion si një opsion bërthamor dhe do të preferonin shumë më tepër një marrëveshje në dy javët e ardhshme.
Trump aktualisht nuk po luan një rol aktiv në përpjekjet për të arritur një armëpushim dhe në fakt i ka dhënë Kryeministrit Benjamin Netanyahu një dritë jeshile për të bërë siç e sheh të arsyeshme, thonë zyrtarët izraelitë.
Kthimi në luftë të plotë do të vinte pasi Izraeli tashmë i ndërpreu të gjitha furnizimet me ushqim, ujë dhe ilaçe për civilët në Gaza pasi armëpushimi u prish dy muaj më parë.
Operacionet ushtarake të Izraelit në Gaza kanë vrarë 52 mijë palestinezë, shumica e tyre civilë, sipas Ministrisë së Shëndetësisë në Gazën e udhëhequr nga Hamasi.
Netanyahu ka hedhur poshtë çdo propozim që i jep fund luftës plotësisht, duke i bërë presion Hamasit në vend të kësaj të nënshkruajë një marrëveshje afatshkurtër.
Zyrtarët izraelitë shpresojnë se kërcënimi i një pushtimi në shkallë të gjerë do ta shtyjë Hamasin të pranojë një marrëveshje sipas kushteve të Izraelit.
Trump do të udhëtojë në Lindjen e Mesme duke filluar nga e hëna për një vizitë tre-ditore në Arabinë Saudite, Katar dhe Emiratet e Bashkuara Arabe.
Trump nuk pritet të vizitojë Izraelin.
Zyrtarët amerikanë dhe izraelitë kanë thënë sakaq se lufta e vazhdueshme në Gaza është arsyeja kryesore.
“Asgjë e mirë nuk mund të dalë nga një vizitë në Izrael në këtë moment”, ka thënë një zyrtar amerikan për Axios.
