Italia nuk do t’i bashkohet iniciativës së Bordit të Paqes, të propozuar nga presidenti amerikan Donald Trump. Sipas të përditshmes “Corriere della Sera” vendimi merret mes shqetësimeve se një grup i tillë i drejtuar nga udhëheqësi i një shteti të vetëm do të përbënte shkelje për kushtetutën italiane.
Plani i Trump ka nxitur reagime edhe nga aleatë të tjerë perëndimorë, të cilët mendojnë se organizata e re mund të minojë punën e OKB. Sipas të dërguarit të posaçëm të SHBA, Steve Wittkof, deri më tani rreth 25 vende kanë firmosur për t’iu bashkuar bordit, megjithatë sipas burimeve jo të gjithë e kanë thënë këtë publikisht.
“Mendoj se kemi 20 ose ndoshta, 25 vende qe kane pranuar”, tha Witkof për TV amerikane.
Mes vendeve që kanë pranuar zyrtarisht ftesën e Trump janë Shqipëria, Kosova, Azerbajxhani, Egjipti, Emiratet e Bashkuara Arabe, Bjellorusia dhe Hungaria. Zyra e kryeminsitrit izraelit Netanjahu e konfirmoi pjesëmarrjen të mërkurën.