Prokuroria e Posaçme ka lëshuar disa masa sigurie për abuzime me tenderë te AKSHI. Në orët e para të mëngjesit, SPAK dhe forcat e BKH-së zbarkuan në rezidencën e Kodrës së Diellit në Tiranë ku ushtruan kontrolle, ndërsa ende nuk dihet sa prej masave të sigurisë janë ekzekutuar pasi operacioni është ende në vijim.
Burime për gazetaren e Report Tv, Keti Banushi bëjnë me dije se SPAK ka caktuar masën arrest shtëpie për drejtoreshën e AKSHI-t, Mirlinda Karçanaj. Ndërkohë, masa arrest me burg është caktuar për dy biznesmenë, Ergys Agasi dhe Ermal Beqiraj, por ende nuk dihet nëse janë ekzekutuar.
Mësohet se është caktuar masa pezullim nga detyra për Erjon Ismaili zv.drejtor i Policisë së Tiranës.
Hetimet për këtë çështje kanë nisur një vit më parë dhe prokuror i çështjes është Bledar Maksuti. Gjatë ditëve të fundit, hetuesit kanë thirrur dhe marrë në pyetjeve 25 zyrtarë të AKSHI-t, që janë kryesisht anëtarë të Komisionit të Vlerësimit të Ofertave dhe anëtarë të Komisionit të Shqyrtimit të Ankesave.
Ende SPAK nuk ka dhënë detaje as konfirmim zyrtar mbi këtë operacion në zhvillim, ndërsa pritet që në vijim të ketë një deklaratë publike për mediat.