Detaje të reja nga kërcënimi që i është bërë ministrit shqiptar në Malin e Zi të Administratës Publike, Marash Dukaj, nga një kriminel i rrezikshëm turk që vuan dënimin në shtetin fqinj.
Sipas medieve të Malit të Zi, ministri Dukaj u premtoi miqve të tij nga Kosova dhe Shqipëria se do të pyeste në Ministrinë e Brendshme për mundësinë që Binali Camgoz të merrte ligjërisht azil në Mal të Zi.
Por në momentin kur kjo nuk ndodhi, shtetasi turk i akuzuar për krime të rënda e kërcënoi atë përmes anëtarëve të klanit kriminal të Kavaçit.
MInistri Dukaj kishte pranuar se katër apo pesë muaj më parë, një shok nga Prishtina e kishte kontaktuar dhe i kishte kërkuar që të takohej me të.
Ai nuk e tha emrin e shokut nga Kosova, por zbuloi emrin e personit që ai i kërkoi të takonte. Sipas Dukaj, ai u takua me shtetasin Indrit Kolleshi, i dënuar më parë për mashtrim në Shqipëri.
Ministri Dukaj, tha se ishte, Indrit Kolleshi që i kërkoi ndihmë për dhënien e azilit për mafiozin turk, por që ai personalisht nuk premtoi asgjë konkrete, thjesht interesim mbi rastin sipas procedurave dhe ligjeve të azilit.
lndritrit Aliut (Kolleshi) me origjinë nga Vlora ishte i ‘vjetër’ në zanatin e mashtrimit, ai ka qenë i dënuar për të njëjtën vepër penale në vitin 2011 me 10 vjet burg.
Karriera si mashtrues e “zyrtarit” Indrit Aliut (Kolleshi):
Nisi që prej vitit 2008, ku emri dhe fytyra e tij doli kudo si i arratisuri me 3 milionë euro me vete, të cilat i kishte përvetësuar duke mashtruar.
Ai mundi të mashtrojë edhe policinë e shtetit, aso kohe. Edhe atyre u kishte premtuar ndihma me vlera marramendëse, por që sigurisht nuk morën asgjë.
Pas shpalljes në kërkim, në vitin 2010 ai u arrestua në Greqi dhe prej andej u ekstradua në vendin tonë. Ai u dënua me 10 vjet burg.
Asokohe i dyshuari u arrestua në Greqi pas dhjetëra denoncimeve të bëra ndaj tij në Tiranë për mashtrim. Sipas dosjes, në 24 shtator 2008, ai ka regjistruar në QKR shoqërinë “Dejs&Partners Consulting”, ku ishte ortak i vetëm.
Objekt i aktivitetit ishte “konsulenca juridike dhe fiskale për individët dhe shoqëritë tregtare, si dhe te gjitha aktivitetet që lidhen me fushën e ndërtimit”.
Nën emrin e kësaj shoqërie, sipas prokurorisë, Indrit Aliu ka hartuar kontrata me shoqëri të ndryshme sipërmarrëse për kryerjen e punimeve të ndryshme ndërtimore nëpër Shqipëri, por, pasi merrte pagesa nga këto shoqëri në formën e sigurimit të kontratës, ai nuk i ka likuiduar ato për punimet e kryera.
Për t’u dukur i besueshëm dhe se përfaqësonte një shoqëri serioze, Aliu ishte shfaqur në programe televizive, kishte sponsorizuar emisione, pretendonte se kishte njohje të shumta në institucionet shtetërore dhe se në zyrë mbante foto me figura të njohura publike, përfshirë drejtues të policisë së kohës dhe personazhe të lidhur me politikën./m.j
