Policia e Tiranës ka vënë në pranga një person pasi në bashkëpunim me dy të tjerë kanë ushtruar dhunë fizike ndaj një shitësi tabakino dhe i kanë marrë 1 mln lekë në tek ‘Kthesa e Kamzës’.
Në kuadër të operacionit policor të koduar “Reaction” u bë i mundur identifikimi, kapja dhe arrestimi i Marash Aliaj, 33 vjeç. Gjatë operacionit për arrestimin e tij, në rrugën “Sabaudin Gabrani”, ai ka kundërshtuar me dhunë punonjësit e Policisë.
Ndërkohë, janë shpallur në kërkim edhe dy autorët e tjerë të dyshuar, Elton Hunda, 35 vjeç dhe Genc Logu, 34 vjeç. Të tre personat rezultojnë me precedentë të theksuar kriminalë në fushën e krimeve kundër personit dhe pronës.
Njoftimi i Policisë:
Tiranë/ Finalizohet nga Komisariati i Policisë Nr. 6, operacioni policor i koduar “Reaction”. Zbardhet një rast vjedhjeje me dhunë, ndodhur mëngjesin e djeshëm.
Ushtruan dhunë ndaj shitësit të një biznesi dhe vodhën 100 000 lekë të rinj, si rezultat i veprimeve të shpejta hetimore nga Policia identifikohen 3 autorët e dyshuar. Kapet dhe vihet në pranga njëri prej tyre, punohet për kapjen e 2 të tjerëve. Të tre autorët me precedent të theksuar kriminal në fushën e krimeve kundër personit dhe pronës.
Specialistët për Hetimin e Krimeve në Komisariatin e Policisë Nr. 6 pas njoftimit të marrë se tre shtetas, në bashkëpunim me njëri-tjetrin, kishin vjedhur me dhunë një shumë parash, në një biznes (tabachino), në vendin e quajtur “Kthesa e Kamzës”, menjëherë kanë organizuar punën për identifikimin dhe kapjen e tyre.
Në kuadër të operacionit policor të koduar “Reaction”, u bë i mundur identifikimi, kapja dhe arrestimi i shtetasit M. A., 33 vjeç, i cili gjatë operacionit policor për kapjen e tij, në rrugën “Sabaudin Gabrani”, ka kundërshtuar me dhunë punonjësit e Policisë, si dhe u shpallën në kërkim shtetasit E. H., 35 vjeç dhe G. L., 34 vjeç.
Nga veprimet hetimore dyshohet se këta tre shtetas, në bashkëpunim me njëri-tjetrin, i kanë marrë me dhunë 100 000 lekë të rinj shitësit të një biznesi duke e dhunuar fizikisht.
Vijojnë hetimet për zbardhjen dhe dokumentimin e vjedhjeve të tjera që mund të jenë kryer nga këta shtetas.
Materialet i kaluan Prokurorisë, për veprën penale “Vjedhja me dhunë” e kryer në bashkëpunim.