Kryetarja e Komisionit të Apelimit në PD, Adriana Kalaja ka njoftuar për një kallëzim të ri daj gjyqtares së GJKKO, Irena Gjoka.
Përmes një reagimi në rrjetet sociale, ku paralajmëron edhe kallëzimin e radhës për gjyqtaren Gjoka, Kalaja thotë se do të depozitojë në SPAK, kallëzimin penal shtesë, lidhur me falsifikimin që ka bërë gjatë procesit të vettingut, proces në të cilin ajo ka dalë pa probleme.
Sipas Kalasë, kallëzimi shtesë do i përcillet ambasadës së SHBA në Tiranë, si dhe Senatit e Kongresit Amerikan.
“Nesër më datë 22 shtator, ora 11.00, me cilësinë e Kryetares së Komisionit të Apelimit dhe Vlerësimit të Statutit pranë Partisë Demokratike, do paraqitem në SPAK, ku do depozitoj kallëzimin penal shtesë, në ngarkim të Irenës me shumë mbiemra, lidhur me falsifikimin që ka bërë gjatë procesit të vettingut dhe që “rastësisht”, nuk është kapur nga komisionerët e emëruar aty nga Rama e shpura e tij.
Siç e shihni, kontrata e falsifikuar i përket vitit 1996, ku për të justifikuar 80 milion lekë me burim jo të ligjshëm, janë marë si referencë nene të Kodit Civil 801–825, nene të cilat i korrespondojnë Kodit Civil të sotëm, porse Kodi Civil që i korrespondonte kësaj kontrate kishte gjithsej 198 nene.
Për këtë dhe të tjera, ftoj të gjithë mediat që vijojnë t’i shërbejnë interesit publik, të raportojnë këtë lajm shumë të rëndësishëm.
Gjithashtu, Ju bëj me dije se ky kallëzim shtesë, do i përcillet Ambasadës së SHBA akredituar në Shqipëri si dhe Senatit e Kongresit Amerikan.
Deri në fund për rikthimin e Shtetit Ligjor të së Drejtës”, shkruan Kalaja në rrjetet sociale.