Britania e Madhe ka ofruar mbështetje për forcat franceze në një operacion për të kapur një cisternë nafte ruse, i cili është i sanksionuar nga SHBA, BE dhe Mbretëria e Bashkuar, në Detin e Mesdhe.
Operacioni u krye nga marina franceze, e cila përdori helikopterë NH90 Caïman Marine për të zbarkuar ushtarët në kuvertën e anijes, ndërkohë që autoritetet franceze konfirmuan se misioni u realizua në bashkëpunim me aleatët e tyre, përfshirë Britaninë.
Anija “Grinch”, po transportonte naftë nga porti arktik i Murmanskut, në Rusi, kur u kap. Kjo anije është e sanksionuar për shkelje të rregulloreve ndërkombëtare dhe është etiketuar si “flamur i rremë”, një status që i jep mundësinë të konsiderohet pa shtetësi dhe të sekuestrohet. Anija kishte shmangur ujërat britanike, por kaloi përmes Ngushticës së Gjibraltarit, përpara se të kapeshin.
Sipas ‘The Times’, një ekip inspektimi shqyrtoi dokumentet e anijes dhe konfirmoi dyshimet për rregullsinë e valëvitjes së flamurit, duke dërguar një raport tek prokurori i Marsejës për hetime të mëtejshme.
Ky operacion vjen pas një tjetër misioni të ngjashëm, ku Britania ndihmoi trupat amerikane të kapin një tjetër cisternë ruse të sanksionuar që po transportonte naftë për Venezuela, Rusinë dhe Iranin. Ky operacion kishte mbështetje nga avionë spiunë britanikë dhe anije mbështetëse, ndërsa forcat speciale amerikane SEAL zbritën në kuvertë nga helikopterët për të marrë kontrollin e anijes. Dy shkatërrues amerikanë dhe avionë F-35 ofruan mbështetje ajrore dhe detare.
Presidenti francez, Emmanuel Macron, e përshëndeti operacionin dhe theksoi se Franca nuk do të tolerojë shkelje të sanksioneve ndërkombëtare. Ai nënvizoi se veprimet e flotës në hije, që përfshijnë transportimin e naftës nga Rusia, po kontribuonin në financimin e luftës së agresionit ndaj Ukrainës. Po ashtu, ai shprehu angazhimin për të mbështetur të drejtën ndërkombëtare dhe zbatimin e sanksioneve.
“Nuk do të lëmë asnjë të kalojë” tha Macron.
Presidenti ukrainas Volodymyr Zelensky përshëndeti gjithashtu operacionin, duke thënë se të tilla veprime janë të nevojshme për të siguruar që nafta ruse të mos përdoret për të financuar luftën. Ai shtoi se duhet të ndalohen të gjitha cisternat ruse që operojnë pranë brigjeve evropiane dhe kërkoi masa më të ashpra për të frenuar flotën në hije.
Përveç sanksioneve, Britania po shqyrton mundësinë e përdorimit të naftës së sekuestruar nga cisternat ruse për të financuar përpjekjet e luftës në Ukrainë. Sipas planeve të diskutuar, nafta e sekuestruar mund të përdoret për të ndihmuar financimin e rezistencës ukrainase, duke privuar Rusinë nga të ardhurat e paligjshme të luftës dhe duke mbështetur përpjekjet për të luftuar agresionin rus.
Tankeri “Grinch” ka një histori të ndërlikuar sigurie dhe është e lidhur me aktivitete të dyshimta. Në vitin 2024, ai kaloi përmes Kanalit të Anglisë dhe vitin e kaluar u shfaq në Detin e Zi pranë Krimesë, ku u identifikua për aktivitete të errëta, përfshirë transferime të rrezikshme të naftës midis anijes dhe anijeve të tjera.
Anija është e lidhur me një kompani fiktive të regjistruar në Ishujt Marshall, një territor që përdoret për të fshehur pronarët e vërtetë të anijes.