Delegacioni i Bashkimit Evropian në Shqipëri ka uruar Klodian Brahon për marrjen e detyrës si Kryeprokuror i SPAK-ut.
Delegacioni i BE-së vlerësoi integritetin e SPAK duke i bërë ballë presioneve politike, si dhe theksoi se lufta kundër korrupsionit dhe pandëshkueshmërisë janë kyçe për avancimin e vendit drejt BE.
“Lufta kundër korrupsionit dhe pandëshkueshmërisë, si edhe respektimi i shtetit të së drejtës, janë përgjegjësi e përbashkët e të gjitha institucioneve kyçe dhe një element thelbësor i rrugës së Shqipërisë drejt anëtarësimit në BE—rrugë e mbështetur nga shumica dërrmuese e qytetarëve shqiptarë. U bëjmë thirrje të gjitha institucioneve që të ushtrojnë plotësisht rolin e tyre, të përmbushin përgjegjësitë dhe të bashkëpunojnë pa rezervë për të garantuar llogaridhënie, në dobi të të gjithë qytetarëve”, thuhet në deklaratë.
Po ashtu, delegacioni ka vlerësuar punën e Altin Dumanit, Kryeprokurorit të mëparshëm, duke e falënderuar për qëndrueshmërinë dhe integritetin e treguar gjatë mandatit të tij.
“Njëkohësisht, vlerësojmë SPAK-un për qëndrueshmërinë përballë presioneve politike, si edhe për vendosmërinë dhe integritetin e treguar nga Kryeprokurori i mëparshëm, Altin Dumani. Nën drejtimin e tij, SPAK shënoi hapa përpara në luftën kundër korrupsionit të nivelit të lartë dhe kontribuoi në forcimin e besimit të publikut te drejtësia”, shkruan BE.
Delegacioni i BE-së bëri thirrje për bashkëpunim të plotë ndërmjet institucioneve për të siguruar llogaridhënie dhe transparencë.
“Presim të vijojmë bashkëpunimin me SPAK-un dhe të mbështesim Shqipërinë në çdo hap të procesit të saj të integrimit,” përfundon deklarata e Delegacionit të BE-së.
Klodian Braho mori sot zyrtarisht detyrën ku theksoi se “misioni i SPAK shkon përtej mandateve individuale dhe do të punojmë krah për krah për të përmbushur detyrat e rëndësishme që na janë ngarkuar.”
