Policia në Fier ka arrestuar drejtuesin 64-vjeçar të ambulancës, që u përfshi ditën e djeshme në një aksident të rëndë rrugor, duke u përplasur me një kamion.
“Specialistët e Sektorit të Qarkullimit Rrugor arrestuan në flagrancë shtetasin J. T., 64 vjeç, banues në Skrapar, pasi dje, autoambulanca që drejtonte ky shtetas, u përplas me kamionin që drejtonte shtetasi I. S”, njofton policia.
Po ashtu sqarohet se vijojnë të jenë në kujdesin e mjekëve dhe jashtë rrezikut për jetën, pacienti që po transportohej me autoambulacë dhe punonjësi i policisë që e shoqëronte atë.
Aksidenti ndodhi mesditën e së mërkurës në aksin Fier- Lushnje, në vendin e quajtur “Kryqëzimi i Vajkanit”. Si pasojë e përplasjes së fortë mbetën të lënduar katër persona, dy prej të cilëve ndodheshin në ambulancë.
