Ambasadori amerikan në Izrael, Mike Huckabee, ka bërë një deklaratë kontroverse në podkastin e Tucker Carlson-it, pasi ky i fundit i tregoi një pasazh nga Bibla.
Pasazhi interpretohet shpesh si një e drejtë e Izraelit për të pasur territoret ndërmjet Nilit dhe Eufratit, ose i quajtur ndryshe si Izraeli “biblik”. Pasi Carlson i përmendi këtë pjesë nga Bibla, ambasadori Huckabee u shpreh se “Do të ishte në rregull që t’i merrnin të gjitha”, duke lënë të nënkuptohet që Izraeli t’i merrte këto territore dhe të krijonte Izraelin “biblik”.
Podkasti i publikuar të premten u prit me ashpërsi nga vendet arabe, të cilat dolën me një deklaratë të përbashkët këtë të diel, të përfaqësuara nga Ministria e Jashtme e Emirateve të Bashkuara Arabe. Deklarata u nënshkrua nga: Emiratet, Egjipti, Jordania, Indonezia, Pakistani, Turqia, Arabia Saudite, Katari, Kuvajti, Omani, Bahreini, Libani, Siria dhe Shteti i Palestinës.
Pas presionit të shkaktuar nga kjo deklaratë, ambasadori u shpreh se “Izraeli nuk kërkon t’i marrë ato”, duke shtuar se deklarata ishte “e hiperbolizuar”.
Arabia Saudite i përshkroi fjalët e ambasadorit si “të pamatura” dhe “të papërgjegjshme”, ndërsa Jordania tha se ato përbëjnë “një sulm ndaj sovranitetit të vendeve të rajonit”.
Ministria e Jashtme e Egjiptit deklaroi “se Izraeli nuk ka sovranitet mbi territorin e pushtuar palestinez apo mbi ndonjë tokë tjetër arabe”.
Autoriteti Palestinez deklaroi në X se fjalët e Huckabee “bien ndesh me refuzimin që Presidenti amerikan Donald Trump bën ndaj (Izraelit) për aneksimin e Bregut Perëndimor”.
Sidoqoftë, deklarata e ambasadorit amerikan u prit mirë nga politikani izraelit Amir Ohana, i cili vlerësoi qëndrimet pro-izraelite të ambasadorit dhe kritikoi për “manipulim” Tucker Carlson.
