Një parashutist në Kinën veriperëndimore ka përjetuar një ngjarje të rrallë dhe të frikshme, pasi u tërhoq papritur nga një rrymë ajri drejt lartësisë marramendëse prej 8 mijë e 500 metrash, vetëm pak më poshtë se maja e Everestit.
Peng Yujiang, 55 vjeç, ishte mbi malet Qilian, rreth 3 mijë metra mbi nivelin e detit, duke testuar pajisje të reja, kur një rrymë ajri e njohur si “thithje nga reja” (cloud suck) e tërhoqi fuqishëm edhe 5 mijë metra më lart, brenda një reje të madhe.
Ngjarja ndodhi të shtunën dhe u filmua nga kamera e vendosur në parashutën e tij. Pamjet u publikuan në platformën Douyin (TikTok-u kinez) dhe u përhapën me shpejtësi në rrjet.
Në video shihet se si Peng mban fort kontrollin e parashutës, me fytyrën dhe trupin të mbuluar nga kristale akulli.
“Ishte e tmerrshme… gjithçka ishte e bardhë. Nuk shihja asnjë drejtim. Pa busullën, nuk do të dija nga po shkoja. Mendoja se po fluturoja drejt, por në të vërtetë po rrotullohesha”, rrëfeu ai për mediat kineze.
Në atë lartësi, ku temperatura bie deri në minus 40 gradë Celsius dhe mungon oksigjeni, mbijetesa është thuajse e pamundur. Peng thotë se ka ndjerë se mund të humbte ndjenjat gjatë zbritjes dhe pjesa më e frikshme ishte përpjekja për të rimarrë kontrollin e parashutës që po rrotullohej pa kontroll.
Autoritetet kineze po hetojnë incidentin dhe kanë pezulluar Peng për 6 muaj, pasi fluturimi nuk ishte i autorizuar.
Sipas mediave shtetërore, ai nuk kishte planifikuar të fluturonte atë ditë, por thjesht po provonte pajisjen në tokë, mirëpo erërat e forta e ngritën pa paralajmërim.
Fatmirësisht, historia përfundoi pa viktima, vetëm me një tronditje të madhe dhe një mësim të paharrueshëm për të gjithë adhuruesit e sporteve ajrore.