Dalin pamjet kur autorët vendosin lëndën plasëse mëngjesin e së dielës në derën e një lokali në lagjen “Çlirim”. Lënda plasëse është hedhur nga një automjet tip BMW dhe ka qenë me fitil.
Mediat kanë publikuar pamjet e shpërthimit të kryer me lëndë plasëse mëngjesin e së dielës në derën e një lokali në lagjen “Çlirim”.
Nga videoja e kamerave të sigurisë duket qartë se në orën 03:58 minuta një automjet, tip BMW me portobagazh ndalon para derës së lokalit për disa sekonda. Nga mjeti nuk zbret askush por nga xhami i dritares së parë të pasagjerit hidhet diçka në derën e lokalit dhe makina largohet nga vendngjarja. Vetëm gati një minutë më vonë lënda e hedhur shpërthen para derës së lokalit, duke shkaktuar vetëm dëme materiale.
Burimet policore, që disponojnë edhe këto pamje filmike dalin në konkluzionin se në mjet kanë qenë dy ose më shumë persona dhe se askush nuk ka dalë nga mjeti pasi ishin në dijeni të kamerave përreth dhe nuk donin të identifikoheshin. Po të njëjtat burime konfirmojnë se lënda plasëse e hedhur në derën e lokalit të shtetasit Sali Fetiu është hedhur me fitil të ndezur.
Burime nga policia konfirmojnë se po hetohet në disa pista dhe se deri më tani janë shoqëruar disa persona por nuk ka ende një person të identifikuar si të përfshirë në këtë ngjarje. Lokali në pronësi të shtetasit Sali Fetiu vijon të jetë i mbyllur prej 2 vjetësh dhe në xhamat e tij shihet tabela “Jepet me qira”. Grupi hetimor po vijon veprimet, me qëllim zbardhjen e rrethanave të rastit dhe identifikimin e kapjen e autorit/ve.
Dyshohet se hedhja e lëndës plasëse ka qenë një paralajmërim për djalin e pronarit të lokalit, 37-vjeçarin Asllan Fetiu.
Ky i fundit, në 24 mars 2025 ka plagosur me thikë në lokalin përballë një klient 85-vjeç që gjendej brenda në lokalin ku 37-vjeçari Asllan Fetiu, në gjendje të dehur, ka kërkuar një shtetas në lokal dhe pasi nuk e ka gjetur ka qëlluar me thikë klientin 85-vjeç Todi Biçaku. Burimet policore bëjnë me dije se plagosja e dy muajve më parë nuk është pista e vetme ku po hetohet, por po hetohet edhe në pistën e larjes së hesapeve të pazareve të prishura të bizneseve të kundërligjshme jashtë shtetit.