Ekspertja për çështjet e integrimit, Nirvana Deliu e ftuar në studion e RTSH 24 ka vënë fokusin te anëtarësimi i Shqipërisë në Bashkimin Evropian, duke vënë theksin rëndësia e grupkapitujve 23-24 për arritjen e këtij qëllimi.
Ndërsa sqaroi fokusin e këtyre dy kapitujve themelorë, Deliu nënvizoi në krye të fjalës së saj se, nëse çalohet pikërisht në këto dy kapituj, i gjithë procesi i negociatave me Bashkimin Evropian pezullohet.
Deliu bëri me dije se fokusi i kapitullin 23 përqendrohet te gjyqësori dhe të drejtat themelore, ndërsa kapitulli 24 ka në thelb të tij drejtësinë, lirinë dhe sigurinë.
“Kapitulli 23 ka në fokus gjyqësorin dhe të drejtat themelore, ndahet në 3 fusha madhore që janë: gjyqësori, apo sistemi i drejtësisë ku ne kemi reformën në drejtësi; antikorrupsioni dhe të drejtat themelore të njeriut.
Ndërsa kapitulli 24: drejtësi, liri, siguri, është një kapitull shumë i rëndësishëm sepse përmban 12 nënfusha.
Lidhet drejtpërdrejtë me sigurinë, me migracionin, azilin, menaxhimin e integruar të kufijve, bashkëpunimi policor e gjyqësor, luftën kundër krimit të organizuar, kundër drogave.
Këto dy kapituj i hapim të parët por mbyllen të fundit.
Progresi dhe reformat që ne bëjmë në këto dy kapituj ndikojnë në vetë procesin e negociatave. Nëse çalojmë në këto 2 kapituj, mund të na pezullohet procesi i negociatave. Prandaj dhe BE i cilëson si kapituj themelorë”, u shpreh Deliu.
Pyetur mbi rëndësinë e pagesave në euro, Deliu deklaroi se SEPA ishte një tjetër element i diskutuar në Forumin për Dialogun Shqipëri-BE për Sigurinë dhe Mbrojtjen. Në këtë kuadër, Deliu bëri me dije se në muajt tetor-nëntor parashikohet që SEPA të hyjë në fuqi, duke lehtësuar kështu kostot e transaksioneve jashtë Shqipërisë të qytetarëve dhe bizneseve.
“SEPA ishte një element tjetër shumë i rëndësishëm u diskutua që në nëntor kur doli lajmi që Shqipëria dhe Mali i Zi do ishin dy vendet e para që do bëheshin pjesë e SEPA-s. Artikulli ishte interesant sepse dha elementin teknik, sqarimin e procedurës dhe tregoi se në prill është bërë e mundur që të gjitha bankat e nivelit të dytë kanë pranuar që ta përdorin SEPA-n dhe është parashikuar që në tetor-nëntor të 2025-ës të futet në fuqi dhe ne të ndjejmë benefitet që SEPA na jep.
SEPA është zona unike e pagesave në euro pjesë e saj nënkupton që do ulen komisionet për transaksionet që bëjmë me jashtë Shqipërisë edhe mes monedhave të ndryshme. Këto komisione do jenë njësoj si ato që përdorim në vendin tonë. Do ketë ulje të kostove për qytetarët dhe bizneset”, deklaroi Deliu.
