Edhe pse ishte parashikuar që armëpushimi në Gaza të hynte në fuqi mëngjesin e sotëm, kjo nuk ka ndodhur. Kryeministri izraelit Benjamin Netanyahu tha se armëpushimi në Gaza nuk do të fillojë derisa grupi militant palestinez Hamas të sigurojë një listë të pengjeve që do të lirohen.
Njoftimi i Netanyahut erdhi një orë para afatit të armëpushimit. Pritej që pengjet të liroheshin brenda disa orësh nga fillimi i armëpushimit, duke hapur rrugën për një fund të mundshëm të një lufte 15-mujore që ka tronditur Lindjen e Mesme.
“Kryeministri udhëzoi IDF-në (Forcat e Mbrojtjes së Izraelit) që armëpushimi, i cili supozohet të hyjë në fuqi në orën 8:30 të mëngjesit, nuk do të fillojë derisa Izraeli të ketë listën e të rrëmbyerve të liruar që Hamasi është zotuar të sigurojë,” tha sot zyra e kryeministrit izraelit.
Hamasi pohoi angazhimin e tij ndaj marrëveshjes së armëpushimit të Gazës, duke thënë se vonesa në zbulimin e emrave të pengjeve që do të liroheshin në fazën e parë ishte për shkak të “arsyeve teknike në terren”.
Ndërkaq forcat izraelite kishin filluar të tërhiqeshin nga zonat në Rafah të Gazës në korridorin e Filadelfit përgjatë kufirit midis Egjiptit dhe Gazës, raportuan mediat pro-Hamasit sot herët në mëngjes.
Ushtria izraelite paralajmëroi banorët e Gazës që të mos iu afrohen trupave të saj ose të lëvizin nëpër territorin palestinez përpara afatit të armëpushimit, duke shtuar se kur të lejohet lëvizja “do të lëshohet një deklaratë dhe udhëzime për metodat e sigurta të tranzitit”.
Marrëveshja e armëpushimit pasoi disa muaj negociatash të ndërmjetësuara nga Egjipti, Katari dhe Shtetet e Bashkuara dhe erdhi pak përpara inaugurimit të Presidentit të zgjedhur të SHBA-së, Donald Trump, më 20 janar.
Armëpushimi me tre faza do të hynte në fuqi sot në orën 06:30.
Faza e parë e saj do të zgjasë gjashtë javë, gjatë së cilës 33 nga 98 pengjet e mbetura – gra, fëmijë, burra mbi 50 vjeç, të sëmurë dhe të plagosur – do të lirohen në këmbim të gati 2,000 të burgosurve dhe të paraburgosurve palestinezë.