Një nga fenomenet më të rënda në dosjen “Bankers”, e hetuar fillimisht nga Prokuroria e Fierit dhe më pas nga Prokuroria e Posaçme, ka qenë implikimi i disa pronarëve të kompanive që kanë lidhur kontratë me koncesionarin, të cilat kanë thithur e përthithur dhjetëra miliona euro, duke u kthyer më fitimprurëse sesa vetë firma mëmë. Këto kompani janë quajtur me të drejta “shushunja” të cilat kanë bërë kontrata të majme, ndërkohë që në atë zonë operonin dhjetëra të tilla, shqiptare dhe të huaja.
Hetimet e prokurorisë kanë nxjerrë se drejtuesit shqiptare të “Bankers” kishin krijuar kompanitë e tyre, me pronarë shqiptare, bashkëpunon dhe ndoshta ndanin paratë, ndërkohë që e njëjta skemë përdorej edhe nga drejtuesit kinezë, të cilët arritën që të katapultonin në krye të disa firmave private njerëzit e tyre. Të dyja fenomenet kishin qëllim tjetërsimin e parave të nëntokës shqiptare, pasi në këtë mënyrë nuk paguanin detyrime ndaj pushtetit qendror, lokal apo ndaj banorëve të zonës.
Një nga emrat që ka dalë në këtë dosje është edhe 64 vjeçari Behar Çukaj, nga qyteti i Fierit, i cili është pronar i disa kompanive, me në krye Bolv Oil, teksa selia qendrore e kësaj firme është në zonën e Marinzës, atje ku operon edhe koncesionari “Bankers”. Për vite me radhë, firmat e Çukajt kanë lidhur kontrata me firmën që shfrytëzon burimin më të madh të hidrokarbureve në Shqipëri, fushën naftëmbajtëse Patos – Marinzë, ndërkohë që pasi voli mirë e mirë, kompanitë e tij janë fokusuar tashmë te ndërtimi, kryesisht në Tiranë.
Faksimile: Leja e qeverisë për kompleksin “Kashari Center”, në pronësi të biznesmenit Behar Çukaj
Sipas dokumenteve që disponon Prapaskena qeveria shqiptare ka zbardhur javët e fundit një nga lejet e radhës për ndërtimin në Shqipëri, i quajtur “Kashari Center”, i cili do të ngrihet në hyrje të Tiranës, në zonën pas “Casa Italia”, në afërsi të dy komplekseve të tjera që kanë marrë leje. Me një sipërfaqe prej rreth 26 mijë metrash katrorë, Çukaj do të ngrejë plot 5 kulla, mbitokë 9 kate dhe nëntokë 2 kate.
Më shumë se një leje, vendimi i qeverisë duket një “shpërblim” ndaj këtij emri, pasi megjithëse i ka dalë emri disa herë në dosjet penale, nga Prokuroria e Fierit dhe më vonë nga SPAK-u, sërish arrin të marrë leje dhe të ndërtojë. Raportet e ndryshme financiare apo hetimore kanë dalë në konkluzionin se paratë e pista në këtë vendin tonë kanalizohen në ndërtime, ndërkohë që rasti në fjalë duhet të hetohet nga këto organe ligjzbatuese, të cilat duhet t’u thonë shqiptarëve nëse pasuria e tyre nëntokësore po shkon në ndërtime.
(Vendndodhja e kullave)
Në dokumente përcaktohet se “Kashari Center” është një objekt banimi dhe shërbimi 1 dhe 9 kate mbi tokë dhe 2 kate nëntokë, me vendndodhje në Bulevardin e Kasharit, Tiranë, me zhvillues shoqëritë “Kashari Center” shpk dhe z. Behar Çukaj. Kompania “Kashari Center” është themeluar në vitin 2025 me pronar po z. Behar Çukaj.
“Zona ku do jenë objektet e propozuara gjendet në periferi të qytetit të Tiranës, në zonën e Kasharit, në një hapësirë urbane, e përdorur kryesisht për objekte banimi dhe shërbimi. Prona ndodhet përgjatë rrugës ‘Pavarësia’ dhe Bulevardit të Kasharit, në Kashar, dhe ka afërsi me autostradën Tiranë-Durrës. Kjo mundëson përfitimin nga afërsia me një nga arteriet kryesore të qytetit, por njëkohësisht e mbron nga fluksi i lartë i trafikut dhe zhurma” thuhet në dokumente.
Sipas tyre, prona që do të zhvillohet është terren i paurbanizuar, i karakterizuar nga vegjetacini i ulët. Trualli që kërkohet të zhvillohet ka një sipërfaqe totale prej 26.500 m². “Në zonë kanë filluar ndërtime të reja dhe komplekse bashkëkohore, duke shënuar një transformim gradual të fytyrës urbane” vijon dokumenti. Në maketin e propozuar dhe miratuar nga KKTU duken se objektet janë në forma të rregullta drejtkëndore të shpërndara në terren duke ruajtur distancat ndërmjet tyre. Hyrja për në shesh bëhet e mundur nga ana lindore, jugore dhe perëndimore e tij dhe aksesohet lehtësisht nga tre rrugët që e kufizojnë sheshin.
Prapaskena shfletoi edhe dokumente të tjera ku rezulton se firma ndërtuese “Kashari center” është themeluar nga Behar Çukaj, 64 vjeç, lindur në Fier e banues në Tiranë. “Sot më datë 10 prill 2025, bazuar në vullnetin e tij të lirë dhe në përputhje me ligjin, vendosën të themelojnë shoqërinë tregtare me përgjegjësi të kufizuar, e cila e ushtron aktivitetin e saj pa afat” thuhet në dokumente.
Pra, një kompani e themeluar vetëm 1 vit më parë ka arritur të marrë një super leje, të miratuar në 2025 dhe të zbardhur vetëm para disa javësh. Objekti i firmës është projektim dhe ndërtim i objekteve civile apo industriale dhe menaxhimi i zbatimit të projekteve të kësaj natyre për vete dhe për të tretë. Gjithashtu merret me veprimtari ekonomike në fushën e turizmit, nëpërmjet ngritjes, operimit dhe administrimit të strukturave turistike pritëse (akomoduese) dhe te gjitha sherbimet direkt apo indirekt te lidhura me to.