Hetimi i SPAK për dosjen “Aruba” dhe çështjen e Zvërnecit nuk ka tërhequr vëmendjen vetëm të mediave shqiptare.
Regjistri zyrtar i kërkesave për informacion, i administruar nga Prokuroria e Posaçme gjatë muajit qershor, tregon se disa nga mediat më të mëdha ndërkombëtare kanë kërkuar sqarime zyrtare lidhur me hetimin që lidhet me transaksionet e tokave në zonën e mbrojtur të Zvërnecit dhe projektin e investimit ku është përfshirë edhe emri i Jared Kushner, dhëndrit të Presidentit amerikan Donald Trump.
Interesi i mediave të huaja vjen në një kohë kur Shqipëria prej më shumë se 50 ditësh është përfshirë nga protesta të vazhdueshme, të cilat nisën në Zvërnec si kundërshtim ndaj projektit turistik, por më pas u shndërruan në një lëvizje më të gjerë kundër politikave të qeverisë për zhvillimin e territorit dhe menaxhimin e pronave publike.
Ndërkohë, SPAK ka konfirmuar se ka nisur një hetim penal lidhur me çështjen e Zvërnecit. Në kuadër të këtij hetimi, sipas burimeve, është bllokuar edhe transaksioni për shitjen e tokës, ndërsa po verifikohen procedurat që lidhen me pronësinë dhe zhvillimin e projektit. Pra jemi te dosja “Aruba”.
Regjistri i kërkesave për informacion tregon se më 2 qershor CNN London iu drejtua zyrtarisht SPAK-ut duke pyetur nëse ishte hapur një hetim për projektin e resortit në zonën e mbrojtur Pishë-Poro–Nartë dhe nëse hetimi përfshinte edhe blerjen e tokave nga kompania Affinity Partners, fondi i investimeve i lidhur me Jared Kushner.
Në përgjigjen e kthyer më 8 qershor, SPAK shkruan se “nuk ka një hetim të hapur për ndonjë projekt të lidhur me Jared Kushner“, por njëkohësisht sqaron se ka nisur një hetim të veçantë, i cili sipas Prokurorisë nuk lidhet me objektin e pyetjes së medias. SPAK shton se për shkak të sekretit hetimor nuk mund të japë detaje të tjera.
Edhe në këtë rast përgjigjja e SPAK ishte e njëjtë. Prokuroria thekson se nuk ka një hetim për ndonjë projekt të lidhur me Kushner, por konfirmon se ekziston një hetim tjetër, për të cilin nuk mund të bëhen publike detaje për shkak të sekretit hetimor.
Interes të veçantë ka shfaqur edhe The New York Times, përmes redaksisë së saj në Londër. Gazeta amerikane kërkoi të dinte nëse SPAK po hetonte ndryshimet e statusit të ishullit të Sazanit dhe të qindra hektarëve në peizazhin e mbrojtur Vjosë-Nartë, si dhe nëse këto ndryshime të vitit 2024 kishin hapur rrugën për zhvillimin turistik në zonë. Në kërkesë përmendej gjithashtu rëndësia ekologjike e territorit, duke kujtuar se bëhet fjalë për një zonë me flamingo, breshka detare dhe specie të tjera të mbrojtura. Në regjistër rezulton se SPAK ka kthyer përgjigje më 4 qershor, pa bërë publik përmbajtjen e saj.
Edhe Anadolu Agency iu drejtua Prokurorisë së Posaçme për të marrë informacion mbi veprimet e ndërmarra ndaj kompanisë Albania Land Development, e cila zotëron tokat ku parashikohet zhvillimi i projektit në Zvërnec. Agjencia kërkoi të dinte bazën ligjore të sekuestrimit preventiv të llogarive bankare, shtrirjen e hetimit dhe nëse po verifikoheshin edhe subjekte të tjera të përfshira në transaksionet e tokave.
Në përgjigjen e saj, SPAK përsëriti se nuk ka një hetim të hapur për ndonjë projekt të lidhur me Jared Kushner, por konfirmoi ekzistencën e një hetimi tjetër që nuk mund të bëhet publik. Gjithashtu, Prokuroria sqaroi se nuk kishte urdhëruar sekuestrim preventiv të llogarive bankare të Albania Land Development.
Interesi i mediave ndërkombëtare nuk kufizohet vetëm te këto redaksi. Në regjistrin zyrtar figurojnë gjithashtu kërkesa nga SeeNews, e cila pyeti për raportimet mbi bllokimin e fondeve të kompanive të vëllezërve Khayatt, ndërsa SPAK u përgjigj se nuk kishte sekuestruar llogaritë bankare të tyre. Po ashtu ka pasur dhe media të tjera. /Pamfleti
