Duke dërguar ekipin e tij për të diskutuar paqen me ekipin e presidentit rus, Vladimir Putin përpara se të konsultohej me Evropën, Presidenti i SHBA Donald Trump i ka lënë liderët evropianë të përpiqen të gjejnë një rol në përpjekjet diplomatike që rrethojnë luftën në Ukrainë.
Trump zbuloi se kishte folur me Putin të mërkurën e kaluar dhe negociatat për t’i dhënë fund luftës në Ukrainë do të fillonin “menjëherë”. Faza e parë e bisedimeve për të ardhmen e Ukrainës u zhvillua në Riad të Arabisë Saudite, pa u ftuar Ukraina apo Evropa në tryezë.
Ja çfarë doli nga takimi:
Katër parime : SHBA dhe Rusia ranë dakord për katër parime, tha të martën Sekretari amerikan i Shtetit, Marco Rubio. Ato përfshijnë rithemelimin e ambasadave në kryeqytetet e tyre përkatëse, SHBA-në emërimin e një ekipi të nivelit të lartë për të ndihmuar në përfundimin e luftës në Ukrainë, fillimin e diskutimit të “bashkëpunimit gjeopolitik dhe ekonomik” që një fund i luftës në Ukrainë mund t’i sigurojë SHBA-së dhe Rusisë dhe së fundi, të gjithë ata që janë përfshirë në bisedimet e sotme angazhohen për të siguruar që ajo të përparojë në mënyrë produktive.
Ja sesi palët e ndryshme po i përgjigjen bisedimeve:
“Arritje e madhe”: Kirill Dmitriev, kreu i fondit të pasurisë sovrane të Rusisë dhe pjesë e ekipit negociator të Rusisë në Arabinë Saudite i përshkroi bisedimet si një “arritje të madhe” pas viteve të armiqësisë, dhe ministri i jashtëm rus Sergej Lavrov tha se bisedimet ishin “të dobishme”.
“Mundësi të jashtëzakonshme”: Rubio tha se mundësi të jashtëzakonshme” mund të jenë në dispozicion si për SHBA ashtu edhe për Rusinë nëse lufta në Ukrainë përfundon. Rubio tha se ka “mundësi të besueshme” për SHBA-në për të “partneruar me rusët gjeopolitikisht për çështje me interes të përbashkët dhe, sinqerisht, ekonomikisht”.
Duke folur me gazetarët pas bisedimeve, Rubio tha gjithashtu se Trump ishte i vetmi person që mund t’i jepte fund luftës në Ukrainë. Ndërkohë, këshilltari amerikan për sigurinë kombëtare, Mike Waltz tha se bisedimet do të përfshijnë diskutime për territorin dhe garancitë e sigurisë.
Ukraina nuk do t’i dorëzohet ultimatumeve të Rusisë, tha Presidenti Volodymyr Zelensky, pas bisedimeve midis zyrtarëve të administratës Trump dhe Moskës. Para bisedimeve të së martës në Riad, Zelensky kishte thënë se do të refuzonte të nënshkruante çdo marrëveshje të negociuar pa përfshirjen e Kievit.
Më herët gjatë ditës, liderë të tjerë evropianë u përgjigjën, me presidentin e Komisionit Evropian duke i thënë të dërguarit të SHBA-së Ukrainë-Rusi gjatë një takimi se “tani është një moment kritik” për luftën dhe se një rezolutë “duhet të respektojë pavarësinë, sovranitetin dhe integritetin territorial të Ukrainës”.
Më vete, Sekretari i Mbrojtjes i Mbretërisë së Bashkuar John Healey tha gjithashtu se përpjekjet për t’i dhënë fund luftës në Ukrainë paralajmërojnë “një epokë të re kërcënimi”.
Kina tha gjithashtu se pret që “të gjitha palët” në luftën në Ukrainë të ulen së bashku për negociatat e paqes. CNN