Paraditen e sotme është konstituuar Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës ndaj fëmijëve dhe grave në familje.
Kryetari i komisionit, deputeti i Aleancës, Burim Ramadani, është zotuar publikisht se komisioni do të punojë mbi bazën e fakteve dhe argumenteve. Ramadani njoftoi se puna e komisionit do të përfshijë tri faza: fazën e hetimeve, që përfshin mbledhjen e provave, vlerësimin e tyre dhe përgatitjen e raportit përfundimtar.
“E kujtojmë që rasti i Arlinda Zekajt është alarm serioz për të gjithë ne dhe, prandaj, qëllimi është që ky komision të punojë mbi bazën e fakteve, dëshmive dhe përgjegjësive konkrete. Ky komision nuk është farsë, është komision që nuk do të bëjë raport politik, por do të bëjë raport mbi bazën e fakteve”.
Nënkryetari i komisionit, Adnan Rrustemi, u shpreh i përkushtuar që kjo çështje të trajtohet me profesionalizëm dhe përgjegjësi të lartë.
“Për të hetuar dhe verifikuar në detaje secilin veprim, mosveprim dhe mospërmbushje të obligimeve ligjore nga institucionet përgjegjëse… Shpreh dedikimin dhe përkushtimin tim që këtë rast ta trajtojmë me profesionalizëm dhe përgjegjësi të madhe e të plotë, në secilin detaj”.
Anëtarja tjetër e komisionit, Besa Kabashi Ramaj nga PDK-ja, ka kërkuar angazhimin e ekspertëve të pavarur për një vlerësim sa më profesional të rastit. Gjithashtu, ajo ka kërkuar që të ftohen për intervistim, lidhur me përgjegjësitë institucionale, kryeministri Albin Kurti, ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla.
“Ndërtimin e kronologjisë institucionale ta bëjmë nga denoncimi i parë deri te vrasja, duke kërkuar çdo veprim ose mosveprim […] angazhimin e ekspertëve të pavarur për një vlerësim profesional dhe objektiv. Propozoj që në kalendarin e dëgjimeve të përfshihen ministrja e Drejtësisë, ministri i Punëve të Brendshme dhe kryeministri”.
Deputetja e LDK-së, Doarsa Kica Xhelili, u shpreh se anëtarët e komisionit kanë përpara një përgjegjësi të rëndësishme në trajtimin e kësaj çështjeje.
“E ndjera Arlinda i ka thënë të gjitha ato që ne sot nuk mund t’i themi dhe e jona është të punojmë shumë në këtë komision hetimor”.
Anëtarët e komisionit do të mblidhen sërish të premten, kur secili prej tyre pritet të prezantojë planin konkret të veprimit për trajtimin e rastit. Komisioni ka 11 anëtarë dhe mandat maksimal prej gjashtë muajsh.
Arlinda Zekaj u vra më 25 tetor në Vitomiricë të Pejës. Vetëm tri ditë para vrasjes, ajo u kishte dërguar një letër institucioneve, duke paralajmëruar se jeta e saj ishte në rrezik.