Shefi i shërbimit zjarrfikës, Sadik Halili dhe qytetarja Xhemile Kapari kanë qenë dëshmitarët e parë të tragjedisë së rëndë që tronditi Maliqin ditën e djeshme, ku si pasojë e një zjarri, nëna së bashku me djalin, Merjeme Azisllari 40 vjeçe dhe Luka Azisllari vetëm 14 vjeç, ndërruan jetë, ndërsa vajza më e vogël e familjes është në gjendje të rëndë për jetën.
Në një deklaratë për mikrofonin e RTSH, Halili ka deklaruar se pas njoftimit të marrë nga salla operative në orën 13:30, kanë mbërritur në vendngjarje ku kanë konstatuar djalin dhe vajzën e familjes jashtë ambienteve të banesës. Halili shton se djali ka qenë në gjendje të pavetëdijshme, ndërsa vajza e vetëdijshme.
Teksa nuk jep asnjë pistë përfundimtare për shkakun që mund të ketë shkaktuar zjarrin, Halili shton se brenda banesës ndodhej soba me dru zjarri dhe fije shkrepëse të ndezura.
“Njoftimin e kemi marrë rreth orës 13.30 të datës 19 tetor, nga salla operative e policisë. Menjëherë kemi arritur në vendin e ngjarjes për 1 minutë pasi distanca është e afërt.
Kur kemi mbërritur në vendin e ngjarjes zjarr nuk ka pasur brenda në banesë dhe të dy fëmijët edhe djalin edhe vajzën i kemi gjetur përjashta. Djali ka qenë i pavetëdijshëm kurse vajza e vetëdijshme dhe tek dera e kuzhinës kemi gjetur të asfiksuar nënën e tyre e cila kishte ndërruar jetë. Njoftuam ambulancën, ju dhamë ndihmën e parë i dërguam në spitalin e Korçës.
Për këtë ngjarje është ngritur grupi hetimor pjesë e të cilit jam edhe unë për të gjetur shkakun e zjarrit. Për momentin kemi dy versione, brenda në kuzhinë ka qenë soba me dru zjarri e ndezur ndërsa poshtë në dysheme kemi gjetur disa fije shkrepëse të ndezura. Nuk mund të themi ende pistën përfundimtare”, deklaroi Halili.
Ndërsa Xhemile Kapari, dëshmitarja e parë e ngjarjes, e cila ishte gjithashtu personi që ndihmoi të miturën, bëri me dije se kanë qenë të qarat e vajzës 6-vjeçare në ballkonin e banesës ato që ngritën alarmin. Ajo shton se, sapo kanë mbërritur në banesë, konstatuan se vajza ishte djegur, ndërsa djali ka qenë i shtrirë barkas.
“Unë dola të hidhja plehrat, edhe ajo çupka qante… qante në oborr. Shkoj atje dhe shoh, ajo dukej sikur ishte futur në kazan, e tëra e nxirë. Thërras komshiun lart dhe i them: ‘Hajde shpejt, shiko çfarë ka ndodhur!’ Më dridhej trupi, nuk shikoja dot. Kur vajtëm, komshiu tha: ‘Kjo është e djegur! Si ka mundësi, është në mes të oborrit?!’ Hapëm derën me këmbë. Djali ishte i shtrirë barkas, me këmbë dhe krahë hapur. Thashë: ‘Ka vdekur.’ Nuk e dinim që edhe nëna ishte brenda, e gjeti policia dhe zjarrfikësja. Vajtëm dhe ngritëm çupkën, ishte një kuvertë atje jashtë dhe e mbështollëm. Asaj i binin flokët dhe kishte plagë nga djegiet. Ata ishin me autizëm, vajza nuk fliste, as nuk ecte, ndërsa djali ecte por nuk fliste. Djali ishte i vdekur që në korridor, ndërsa vajza po qëndronte ulur. Nëna ishte brenda. Kishin vështirësi ekonomike, me dy të sëmurë në shtëpi, kempi 200 mijë lekë nuk u mjaftonte. I ndihmonim dhe i flisnim të ëmës, se ishin dy, një s’e mban dot, jo më dy të sëmurë. Ndihmohej, por me aq lekë sa merrnin, as për bebelina nuk u dilnin. Djalin e çonte në një qendër, ndërsa vajzën jo.”, theksoi ajo.
Një zjarr i rënë rreth orës 13:30 në një banesë në bllokun nr. 3 të qytetit të Maliqit të ditës së djeshme, u kushtoi jetën dy personave.
Nënë e bir, Merjeme Azisllari 40 vjeçe dhe Luka Azisllari vetëm 14 vjeç, sipas autoriteteve humbën jetën si pasojë e asfiksisë. Fëmija tjetër, vetëm 6 vjeçe ndodhet në gjendje të rëndë dhe pas ndihmës së parë në spitalin e Korçës është nisur për ndihmë më të specializuar në Tiranë.