Një 44-vjeçar britanik është shtangur teksa ka parë emrin e tij të lidhur me një bandë venezualiane nga qeveria amerikane.
E gjithë kronologjia e kësaj situate ka të bëjë me një tatuazh të cilin Pepe Belton e ka në krahun e tij të majtë, tatuazh ky i marrë si “i mirëqenë” nga qeveria si dëshmi konkrete për të identifikuar anëtarët e një bande famëkeqe në Venezuelë, të cilët presidenti amerikan Donald Trump po i deporton në një burg të sigurisë së lartë në El Salvador.
Për BBC, Belton është shprehur i surprizuar, por njëkohësisht i shqetësuar për familjen e tij, ku së bashku kishin rezervuar një udhëtim drejt Miami, së bashku me bashkëshorten dhe vajzën e tij në muajin Gusht.
“Është ndjesi e çuditshme, pak qesharake”, tha Belton teksa rrëfen se çfarë i është dashur të heqë nga kjo “ngatërresë”.
Tatuazhi i britanikut identifikon një faqe ore me datën dhe orën e lindjes së vajzës së tij. Dhe ky tatuazh, përfundoi në një foto të bërë publike nga qeveria amerikane si dokument që klasifikon personat me tatuazhe që i përkasin kësaj bande famëkeqe.
Belton thotë se ai nuk ka aspak lidhje me këtë bandë dhe se kjo përfshirje e tij në këtë dokument i duket e pakuptimtë. Ai shpjegon më tej se ky tatuazh është bërë gati një dekadë më parë, kjo verifikuar nga një artist tatuazhesh.
Sa i përket publikimit të dokumenteve në të cilat shfaqen dhe tatuazhet në pjesë të ndryshme të trupit të këtyre personave, cilësohet se përpara se të arrihet në një konkluzion përfundimtar, bëhen konsultimet e nevojshme për të kuptuar nëse dikush prej tyre i përket kësaj bande të rrezikshme të quajtur si TdA.
Një situatë e sikletshme për Belton i cili akoma nuk është i qartë se si përfundoi në këtë listë, duke shprehur me të drejtë dhe shqetësimin e tij.