Emigrantët që paraqesin në mënyrë të pasaktë rrethanat e tyre familjare, ose që paraqesin kërkesa për azil në momentin e fundit do të përballen me rregulla më të rrepta, në kuadër të masave të reja që synojnë parandalimin e abuzimit me sistemin.
Qeveria angleze ka paraqitur amendamente në Projektligjin për Imigracionin dhe Azilin, me qëllim mbylljen e boshllëqeve ligjore që lidhen me Nenin 8 dhe marrjen e masave më të ashpra ndaj personave që paraqesin kërkesa për azil në momentin e fundit.
Sekretarja e Brendshme është e vendosur të ndalojë kriminelët e huaj dhe emigrantët e tjerë që të abuzojnë me ligjet për të drejtat e njeriut, me qëllim shmangien e dëbimit nga Mbretëria e Bashkuar, informon TCH.
Reformat e reja do të bëjnë që gjykatat të marrin parasysh se për sa kohë dhe sa shpesh një prind ka qenë në kontakt me fëmijën e tij, kur shqyrtojnë nëse ekziston një jetë familjare.
Kjo vjen pas përcaktimit në projektligj se koncepti i «jetës familjare» zakonisht kufizohet te marrëdhëniet e ngushta familjare, ku anëtarët e familjes jetojnë së bashku.
Amendamentet e kësaj jave synojnë t’i forcojnë më tej rregullat, duke parandaluar emigrantët që të përforcojnë pretendimet e tyre në bazë të Nenit 8 duke u rikthyer në banesën familjare pak kohë përpara paraqitjes së një kërkese.
Gjithashtu, do të vendosen rregulla të reja që do të mundësojnë që kërkesat për imigracion të paraqitura në momentin e fundit, pa një arsye të mirë, të ndikojnë negativisht në besueshmërinë e personit. Autoritetet përgjegjëse për marrjen e vendimeve do të duhet të marrin parasysh kohën kur paraqiten provat gjatë shqyrtimit të kërkesave.
Kjo do të plotësojë masat e parashikuara në Projektligjin për Imigracionin dhe Azilin për krijimin e një procesi të përshpejtuar vendimmarrjeje për kërkesat e paraqitura me vonesë.
Kjo synon të trajtojë problemin e personave që mbajnë të fshehura informacione ose paraqesin kërkesa në momentin e fundit, duke vonuar ndjeshëm largimin e tyre të ligjshëm nga Mbretëria e Bashkuar.
Sekretarja e Brendshme, Shabana Mahmood, deklaroi: “Publiku britanik duhet të ketë besim se sistemi i imigracionit është i sigurt, i kontrolluar dhe nuk mund të abuzohet.
Këto reforma do të mbrojnë integritetin e sistemit, do të parandalojnë shfrytëzimin e tij dhe do të sigurojnë që personat që nuk kanë të drejtë të qëndrojnë këtu të largohen sa më shpejt.
Kjo mbështetet në punën tonë për të rritur numrin e largimeve dhe për të ulur ndjeshëm kostot e azilit, duke ofruar njëkohësisht strehim dhe mbrojtje për ata që kanë nevojë”.
Në muajin korrik, projektligji kaloi shqyrtimin e dytë në Dhomën e Komunave me një shumicë prej 174 votash.
Ai do të krijojë një mekanizëm që do t’u kërkojë azilkërkuesve që përfitojnë strehim dhe mbështetje të tjera të financuara nga taksapaguesit të kontribuojnë në mbulimin e këtyre kostove, kur të kenë mundësi financiare për ta bërë këtë.
Pagesa do të jetë në formën e një tarife fikse, ndërsa të rriturit që plotësojnë kushtet do të kryejnë pagesa të rregullta për shumat që tejkalojnë një prag të përcaktuar nga Sekretarja e Brendshme.
Gjithashtu, do të krijohet një Autoritet i Pavarur për Apelimet në Çështjet e Imigracionit (IIAA), me qëllim ofrimin e një sistemi të shpejtë dhe të drejtë apelimi, që do të rikthejë besimin e publikut.
Ky autoritet do të jetë në gjendje të përshtatet me ndryshimet e kërkesës dhe të sigurojë që çështjet të shqyrtohen me shpejtësi, në mënyrë që personat, apelimet e të cilëve nuk pranohen, të largohen nga vendi pa vonesa të panevojshme.
Në kuadër të kësaj, do të krijohet një procedurë e vetme apelimi, për të siguruar që paraqitja e kërkesave të reja me qëllim pengimin ose vonimin e funksionimit të sistemit të mos sjellë asnjë përparësi.
Gjithashtu, do të vendoset një përkufizim i vetëm për kërkesat për mbrojtje, duke bashkuar statusin e refugjatit dhe mbrojtjen humanitare. Kjo do të thjeshtojë procesin e marrjes së vendimeve dhe procedurën e apelimit.
Javën e ardhshme, projektligji do të kalojë në fazën e shqyrtimit të detajuar nen për nen gjatë procesit të tij në Parlament.
Burimi: Kronika