Këtë të martë, më 21 tetor, pritet të zhvillohet seanca e radhës paraprake në Gjykatën kundër Korrupsionit dhe Krimit të Organizuar (GJKKO), për të marrë në shqyrtim kërkesën e Prokurorisë së Posaçme (SPAK) për dërgimin në gjyq të ish-kryebashkiakut të Tiranës, Erion Veliaj, bashkëshortes së tij Ajola Xoxa dhe 16 personave të tjerë.
Seanca pritet të nisë rreth orës 09:00.
Sipas dosjes hetimore të SPAK, Veliaj akuzohet për përfshirje në 9 raste korrupsioni, pastrim parash dhe mosdeklarim pasurie, në bashkëpunim me bashkëshorten e tij Ajola Xoxa dhe disa ish-zyrtarë të tjerë të Bashkisë së Tiranës.
Seanca e kaluar e parashikuar të mbahej më 10 tetor, u shty për shkak të avokatëve, të cilët gjendeshin në bojkot, pas vrasjes së gjyqtarit Astrit Kalaja. Në sallë mungoi edhe vetë Erion Veliaj.
Megjithatë sjellim ndërmend se Dhoma e Avokatisë së Shqipërisë ka shpallur edhe këtë javë një bojkot pesëditor të të gjitha seancave gjyqësore penale, duke nisur nga e hëna e 20 tetorit deri më 25 tetor, në shenjë proteste ndaj arrestimit të avokatit U.B.
Vendimi për pezullimin e pjesëmarrjes në gjykata prek edhe proceset në Gjykatën Kushtetuese, me përjashtim të seancave që lidhen me masat e sigurisë. Mbetet për t’u parë nëse kjo seancë do zhvillohet, apo do shtyhet përsëri.