Ish deputeti socialist për një periudhë 20-vjeçare, Kastriot Islami, mandatin e fundit deputet i Partisë Demokratike, ka qenë një nga kritikët dhe armiqtë politikë më të përbetuar dhe radikalë të Edi Ramës. Në vitin 2009, pas humbjes së zgjedhjeve parlamentare nga PS, Islami iu bashkua Lëvizjes për Mendimin Ndryshe me Arben Malajn, Andis Harasanin, Ben Blushin dhe Marko Bellon, duke kërkuar dorëheqjen e Edi Ramës si kryetar i PS-së.
Të gjithë i moderuan qëndrimet ndaj Ramës, sidomos pas vitit 2013, ndërsa Kastriot Islami, 74 vjeç, i njohur edhe si Kaçi i Zi, përshkallëzoi më tej akuzat dhe kritikat ndaj Ramës. Në mars 2013, Ilir Meta nisi të ‘luante bishtin’ në koalicionin mes Berishës pas ‘darkës së ngjalave’ me Edi Ramën. Meta nisi të presiononte Berishën me rrëzimin e qeverisë, duke e shantazhuar me katër votat e tij vendimtare në Kuvend.
Në këto kushte, Berisha hyri në negociata me tre deputetë të PS-së, Kastriot Islamin, Gjovalin Kadeli dhe Asllan Dogjanin, të cilët deklaruan votën kundër rrëzimit të Berishës nëse Meta dhe Rama tentonin t’a rrëzonin me votë në Kuvend. Në këmbim, Sali Berisha i futi Islamin dhe Dogjanin në listën e sigurtë të kandidatëve për deputetë. Madje, në 16 prill 2013, një grup socialistësh protestuan para pallatit të Kastriot Islamit për shkak se bashkoi votat me Berishën në parlament.
Islami u kthye në një nga zërat më radikalë opozitarë kundër Ramës në kampin e Berishës. Kulmi i tensionit arriti në 14 nëntor 2020, kur policia shoqëroi në komisariatin numër dy Kastriot Islamin pasi u kap pa maskë anti-covid dhe kundërshtoi policinë. Shoqërimi për 1 orë në polici u konsiderua nga PD si hakmarrje e Ramës ndaj Islamit për shkak të ‘tradhtisë’ në 2013.
Në 25 mars të vitit 2022 befas Kastriot Islami ndërpreu kritikat kundër Edi Ramës. Nga marsi 2022 deri më sot, Kaçi i Zi nuk ka postuar më asgjë në rrjetin social Facebook, ndërsa dalja e tij e fundit televizive ka qenë nëntor 2022, në televizionin e Bashkim Ulajt, ku evitoi sulmet ndaj Ramës.
Po çfarë ka ndodhur që Kaçi i Zi ‘u zbut’ me Edi Ramën?
Në 26 qershor 2023, Autoriteti i Mbikqyrjes Financiare, asokohe me në krye Ervin Meten, më pas ministër Financash, ka licencuar Florian Islamin për të ushtruar veprimtarinë e aktuarit të autorizuar në sigurime. Florian Islami është djali i Kastriot Islamit. Profesioni i Aktuarit, edhe pse është një profesion i ri dhe pak i njohur në Shqipëri, mund të konsiderohet si ndër më të kërkuarit në botë, në veçanti në sektorin e sigurimeve, fondeve të pensioneve vullnetare, atë bankar dhe të tregut të letrave me vlerë.
Aktuari jep kontributin e tij në menaxhimin e rrezikut bazuar në aftësitë e fituara gjatë formimit në fushën e matematikës, statistikës dhe financës, fusha në të cilat modelet e vlerësimit të rreziqeve janë të bazuara. Licenca nga AMF-ja për të birin, mund të jetë një nga arsyet e tërheqjes së Kastriot Islamit nga lufta 13-vjeçare me Edi Ramën, ndonëse i biri ka plotësuar kriteret për licencim.
Arsye tjetër e ‘zbutjes’ mund të jenë shëndetësore. Sipas burimeve, gjatë tre viteve të fundit, Kastriot Islami ka pasur probleme shëndetësore, duke pësuar paralizë në gjymtyrët e poshtme.
Kastritot Islami ka qenë një nga socialistët me qëndrime më radikale ndaj PD-së kur ishte koha e betejave për ekzistencë të saj. Kur Azem Hajdari hynte në Parlament dhe Kaç Islami përbetohej se do u thyente kafkat deputetëve të PD-së! Islami ka qenë ministër i Arsimit 1997-1998, ministër i Shtetit 1998, ministër i Punëve të Jashtme 1999, zëvendëskryeministër 2002-2004 dhe ministër i Financave 2004-2005. Kur ishte ministër Financash, Berisha i ngjiti nofkën ‘Kaçi Zi’, duke e akuzuar për afera të pretenduara korruptive.
