Protesta e sotme ka marrë një tjetër drejtim në ditën e saj të 94-t, pasi mijëra protestues kanë ndryshuar skenarin e tubimit dhe janë vendosur para Kryeministrisë, duke bllokuar hyrjen dhe daljen nga godina.
Protestuesit janë grumbulluar përpara selisë së qeverisë dhe kanë tentuar të hyjnë brenda ambienteve të saj, ndërsa kanë thirrur në kor “Poshtë komunizmi”.
Në të njëjtën kohë, brenda Kryeministrisë ndodhet kryeministri Edi Rama, së bashku me zyrtarë të tjerë. Kjo lëvizje ka sjellë përplasjet e para me Policinë.
Efektivët kanë krijuar një kordon përpara Kryeministrisë për të penguar avancimin e protestuesve drejt godinës. Tubuesit kanë ushtruar presion mbi kordonin, ndërsa mes tyre dhe forcave të Policisë ka pasur shtyrje dhe përplasje fizike.
Por bllokimi i hyrjeve dhe daljeve të Kryeministrisë rezulton të ketë qenë një skenar i paparashikuar nga Policia. Dispozitivi fillestar ishte përqendruar në mbrojtjen e godinës, ndërsa lëvizja e protestuesve për të bllokuar pikat e hyrjes dhe daljes ka detyruar Policinë të ndryshojë vendosjen në terren.Pas përshkallëzimit të situatës, patrulla dhe forca të tjera policore janë shtuar pranë Kryeministrisë. Efektivët po përforcojnë kordonin, ndërsa protestuesit vijojnë të qëndrojnë pranë hyrjeve të godinës.
Situata merr një tjetër peshë për faktin se Edi Rama ndodhet brenda Kryeministrisë, dhe s’ka nga të dalë.
Pikërisht ky ndryshim i skenarit e ka përshkallëzuar protestën e sotme. Policia po përpiqet të mbajë kordonin dhe të sigurojë hyrjet e Kryeministrisë, ndërsa protestuesit vijojnë bllokimin dhe thirrjet “Poshtë komunizmi”.
