Turistët që duan të afrohen pranë Shatërvanit të Trevit në Romë së shpejti do të duhet të paguajnë një tarifë prej dy eurosh. Kështu ka deklaruar këtë të premte kryebashkiaku i qytetit, ndërsa autoritetet synojnë të përfitojnë më shumë nga atraksionet e shumta të Italisë.
Kryebashkiaku Roberto Gualtieri u tha gazetarëve se sistemi i ri i pagesës do të nisë më 1 shkurt, duke shtuar se masa pritet të sjellë 6.5 milionë euro në vit.
“Dy euro nuk janë shumë… dhe kjo do të çojë në flukse turistike më pak kaotike,” tha Gualtieri, duke theksuar se qytetarët e Romës do të vazhdojnë të kenë hyrje falas te shatërvani, citon Reuters.
Turistët do të duhet të paguajnë nëse duan të ngjiten në shkallët prej guri që rrethojnë pellgun e shatërvanit, ndërsa sheshi i vogël përreth që ofron pamje të monumentit do të mbetet i hapur për të gjithë.
Shatërvani i Trevit, ku sipas traditës vizitorët hedhin një monedhë në ujë për të garantuar kthimin e tyre në Romë, ka qenë prej kohësh një atraksion i madh turistik, madje edhe për liderë botërorë që vizitojnë qytetin.
I përfunduar në vitin 1762, monumenti është një kryevepër e vonë e stilit barok që paraqet Oceanusin, perëndinë e të gjitha ujërave, dhe simbolizon gjendjet e ndryshme të deteve dhe lumenjve të botës.
Ai ka pritur nëntë milion vizitorë vetëm këtë vit, tha Gualtieri, duke sugjeruar se pret që shumë njerëz në të ardhmen të zgjedhin ta shohin shatërvanin nga larg, në vend që të paguajnë për t’u afruar pranë ujit.
Vizitorët të premten thanë se do të ishin të gatshëm të paguanin nëse paratë do të përdoren për mirëmbajtje.
“Nëse do të thotë që paratë përdoren për ta mbajtur të mirëmbajtur, atëherë po, është në rregull,” tha turistja britanike Yvonne Salustri.
Gualtieri tha se pesë vende të tjera relativisht të panjohura në Romë, që aktualisht janë falas, do të fillojnë të tarifojnë pesë euro për hyrje nga shkurti, duke vazhduar trendin e fundit që synon të rrisë të ardhurat nga trashëgimia kulturore e Italisë.
Në vitin 2023, u vendos një tarifë hyrjeje prej pesë eurosh për Panteonin e lashtë të Romës. Si rezultat, sheshi jashtë tij shpesh është i mbushur me njerëz që presin radhën për të paguar dhe hyrë.
Venecia ka prezantuar një sistem tarifash për turistët gjatë sezonit të pikut të udhëtimeve, ndërsa Verona këtë muaj filloi të tarifojë për hyrjen në ballkonin e qytetit verior italian që lidhet me veprën e Shekspirit “Romeo dhe Zhulieta”.