Kaosit të parkimeve në çdo hapësirë që drejtuesit e mjeteve gjejnë bosh, apo parkimet dyshe duke bllokuar akset e Tiranës, policia Rrugore ka vendosur që ti përgjigjet me karroatrec.
Për blutë e Rrugores, këto nuk janë masa për të rritur ndëshkimin e shoferëve, por për lirimin e hapësirave publike që shpesh herë bllokohen nga drejtues të papërgjegjshëm.
“Menjëherë pas analizës së bërë nga Drejtori i Përgjithshëm dhe daljes në detyra konkrete, policia rrugore ka filluar menjëherë me lirimin e hapësirave publike, me punën me karroatrecin e policisë rrugore për lirimin e vendit, vendkalimin e këmbësorëve, për lirimin e hapësirave që janë vendkalime trotuare për zonjat me karroca, apo nënat e moshuara. Këto janë pengesë shumë e madhe. Sidomos për parkimet në afërsi të kryqëzimeve që bëhen pengesë për trafikun”, tha Arben Bakalli, komandanti i Policisë Rrugore
Një tjetër problematikë janë dhe bllokimi i stacioneve të urbaneve të transportit publik që shpesh herë kthehen si vendparkimi për disa drejtues mjetesh.
“Njëkohësisht edhe masat për korsitë e dedikuara, të cilat kryesisht janë pengesë për autobusët, pra mjetet e transportit publik. Në momentin që e kanë të bllokuar nga automjetet e parkuara gabim, ato ndalojnë duke zbritur këmbësoret, pra pasagjerët jashtë stacionit të tyre, por në korsinë e makinave. Për pasojë kjo sjellë një trafik të rënduar me metra të gjata pas autobusit”, shtoi ai.
Puna për lirimin e hapësirave publike nga parkimet e gabuara ka nisur kryesisht në ato zona që kanë një trafik më të rënduar se lagjet periferike.
“Ne kemi filluar pjesën më të madhe nga qendra e qytetit, pjesa e ish-Bllokut, Komuna e Parisit, rruga Papa Gjon Pali, pjesë që ne i konsiderojmë si më problematike. Jemi fokusuar më tepër, sipas porosisë së drejtorit të përgjithshëm në masat për sigurinë rrugore. Nuk jemi përqendruar shumë në lagjet apo rrugicat e Tiranës, por po merremi me pjesën më të rënduar të kryeqytetit dhe më pas do të zgjerohemi dhe më tej”, përfundoi Bakalli
Komandanti i Policisë Rrugore shton se krahas vendparkimeve të gabuara, shkeljet më të zakonshme të drejtuesve të mjeteve janë përdorimi i celularit në timon, mosvendosja e rripit të sigurimit, shpejtësi tej normave etj.