Gjykata e Fierit ka caktuar masën e sigurisë “arrest me burg” për tre punonjës të Kadastrës dhe një ndërtues, të akuzuar për falsifikim dokumentesh e shpërdorim detyre. Konkretisht të arrestuar janë dy drejtorët E. Sh., B. K., specialisti P. Ç., dhe përfituesi i pronave K. H,.
Hetimet e kryera nga Prokuroria e Fierit kanë provuar se K.H., duke paraqitur si tituj pronësie dy vendime të falsifikuara të Komisionit të Kthimit dhe Kompensimit të Pronave Fier, ka arritur të regjistrojë në bashkëpronësi të tij dhe katër personave të tjerë një sipërfaqe të konsiderueshme toke prej 1,143 hektarë si dhe 150.000 Euro në Seman i Ri dhe Sheq Marinas, Fier.
Më pas, ky shtetas, duke u paraqitur me cilësinë e bashkëpronarit dhe përfaqësuesit edhe të bashkëpronarëve të tjerë, me anë të një prokure të posaçme të falsifikuar, u ka shitur këtë tokë dy shoqërive të ndryshme.
Dy drejtorët e Kadastrës në Fier dhe Specialisti P. Ç,. kanë regjistruar pasuritë në fjalë në bashkëpronësi të shtetasit K.H., në kundërshtim me ligjin duke mos kërkuar konfirmimin e vendimeve të Komisionit të Kthimit dhe Kompensimit të Pronave Fier nga Agjencia e Trajtimit të Pronës, verifikim nga i cili do të rezultonte se këto vendime janë të falsifikuara.
Gjithashtu, rezulton se B. K., ish-drejtor i ASHK Fier, përveç pronës së mësipërme, ka regjistruar edhe një tjetër pronë në favor të shtetasit K. H., duke i mundësuar këtij të fundit përfitimin e një sipërfaqeje tjetër të konsiderueshme toke.
Në kuadër të hetimeve u sekuestruan mbi 76 pasuri, me sipërfaqe totale prej 1143 hektarë tokë, si dhe 150.000 euro.