Analisti politik Ben Andoni ka komentuar dokumentin “Besa”, të prezantuar nga kryeministri Edi Rama për protestuesit në bulevard, duke deklaruar se nisma nuk është përthithur nga publiku dhe, sipas tij, po snobohet.
Andoni u shpreh se kryeministri po përpiqet të krijojë një kontratë të re sociale në mes të mandatit, një qasje që ai e konsideron të papërshtatshme.
“Rama më duket i baraslarguar edhe nga partia e tij, edhe nga protestuesit. Edhe koncepti që ka zgjedhur për dokumentin që ai paraqet është një lloj kontrate e re sociale, por për mua kontrata të tilla bëhen nga zgjedhjet, nuk bëhen në mesin e mandatit. Në një fare mënyre mundohet të arnojë mandatin e tij të katërt përpara një publiku që gjithmonë e më shumë është dyshues për gjithë veprimet e tij”, u shpreh Andoni në emisionin “Në çdo kënd” në A2CNN.
Sipas analistit, dokumenti nuk ka gjetur mbështetje as brenda radhëve të Partisë Socialiste.
“Pjesa më e madhe e enturazhit socialist është jo mbështetëse, që do të thotë jo vetëm se nuk e kanë përthithur si material, por është aq abstrakt sa nuk arrijnë ta shpjegojnë para njerëzve. Një dokument që ka një emër parapolitik nuk mund t’i shërbejë një lëvizjeje që kërkon ndryshime politike moderne. Është një paradoks i madh”, deklaroi ai.
Andoni shtoi gjithashtu se, sipas vlerësimit të tij, kryeministri dhe drejtuesit socialistë janë shkëputur nga realiteti me të cilin përballen qytetarët.
