Përmirësohet gjendja shëndetësore e Papa Françeskut. Një nga mjekët që merret me trajtimin e tij, tha se Papa Françesku, i cili po trajtohet në spital për pneumoni të dyfishtë, nuk është në rrezik për jetën, por megjithatë shtoi se nuk është shëruar plotësisht dhe gjendja e tij mund të ndryshojë ende.
“A është jashtë rrezikut? Jo. Por nëse pyetja është ‘a është ai në rrezik për vdekje’, përgjigja është ‘jo’”, tha Sergio Alfieri në një konferencë për shtyp.
Ekipi i tij mjekësor tha se Papa ishte në gjendje të ngrihej nga shtrati dhe të ulej në një kolltuk për të bërë disa punë, por parashikoi se ai do të qëndronte në spital “të paktën” gjatë javës së ardhshme, raporton Reuters.
Mjeku tha se duke qenë se Papa ishte 88 vjeç, me shqetësime të mëparshme shëndetësore, ai ishte padyshim një pacient i brishtë.
Ai shtoi se Papa nuk kishte sepsë, një gjendje potencialisht kërcënuese për jetën kur një trup i përgjigjet një infeksioni duke dëmtuar indet dhe organet e veta. Megjithatë, ai tha se gjithmonë ekzistonte rreziku që infeksioni të përhapej në trupin e tij.