Kryetari i Partisë Demokratike, Sali Berisha, mbajti një takim me Këshillin Koordinues të Diasporës në selinë blu, duke theksuar rolin jetik të diasporës në mbrojtjen e demokracisë dhe në zhvillimin ekonomik të Shqipërisë.
Në këtë takim u prezantua përbërja drejtuese e Këshillit Koordinues. Mark Gjonaj u emërua kryetar, Anxhela Paparizu nënkryetare dhe Ira Londo sekretare. Pjesë e Këshillit janë edhe:
Anila Smorgrav
Brijena Muharremi
Rosario Petta
Besmir Rrjolli
Drita Gjongecaj
Emina Çunmulaj
Ermal Sulaj
Mirela Mezani
Në fjalën e tij, Berisha dënoi ashpër situatën politike në vend, duke e cilësuar atë si instalim të një autokracie dhe duke theksuar rëndësinë e votës së lirë për diasporën shqiptare.
“Diaspora duhet të ketë zërin e saj të fuqishëm kundër instalimit të diktaturës në Shqipëri, përmes votës së saj të garantuar dhe të mbrojtur nga ndërhyrjet e krimit zgjedhor,” tha Berisha. Ai vlerësoi investimin e Mark Gjonajt dhe rolin e diasporës në mbështetjen e vlerave demokratike dhe mbrojtjen e interesit kombëtar.
Berisha shprehu shqetësim për represionin politik ndaj opozitës, duke e quajtur një “grusht shteti” që shërben interesave kriminale dhe korrupsionit transnacional. Ai theksoi se diaspora ka një rol të rëndësishëm në mbrojtjen e standardeve demokratike dhe në garantimin e sovranitetit të Kosovës.
Gjithashtu, kryedemokrati premtoi angazhimin e Partisë Demokratike për të krijuar kushte që diaspora të investojë kapitalin ekonomik, teknik dhe njerëzor në vendlindje. Ai u shpreh për një regjim taksash konkurrues në rajon dhe garantoi hapësira në administratë për shqiptarët që dëshirojnë të kontribuojnë për vendin.
