Gati një vit pas vdekjes së tij në një aksident ajror, nëna e Yevgeny Prigozhinit, Violetta Prigozhina, ka thyer heshtjen në një intervistë për median ruse Fontanka. Ajo ka zbuluar detaje tronditëse rreth takimit të saj të fundit me të birin, duke treguar se ai dukej “i dënuar” pas rebelimit të dështuar dhe e kishte parashikuar vetë vdekjen e tij.
Yevgeny Prigozhin, themeluesi i grupit mercenar Wagner, vdiq në verën e vitit 2023 kur avioni i tij u rrëzua, dy muaj pas marshimit të shkurtër të luftëtarëve të tij drejt Moskës. Agjencitë perëndimore të inteligjencës besojnë se ai u vra me urdhër të presidentit rus, Vladimir Putin, si hakmarrje për kryengritjen.
Violetta Prigozhina tha se e paralajmëroi të birin të mos e sfidonte autoritetin e Putinit, duke i thënë se nuk do të kishte mbështetje reale përveçse nga njerëzit në internet. Por Prigozhin, i sigurt në veprimet e tij, u përgjigj: “Jo, ata do të më mbështesin”.
Gjatë intervistës, ajo këmbënguli se i biri e ndaloi marshimin për të shmangur gjakderdhjen mes trupave ruse.
“Ai nuk kishte ndërmend të rrëzonte Putinin, absolutisht jo. Ai donte vetëm të lidhej me udhëheqjen ushtarake,” pohoi ajo, duke shtuar se djali i saj i kishte thënë se nuk mund t’u qëllonte të rinjve gjatë marshimit.
Pas vdekjes së tij, autoritetet ruse morën kontrollin e perandorisë së tij të gjerë të biznesit. Ndërkohë, forcat e grupit Wagner u përfshinë në strukturat shtetërore ruse, ndërsa djali i tij 27-vjeçar, Pavel, është lënë jashtë loje në luftën për pushtet që pasoi.
Violetta Prigozhina, e cila drejton një galeri arti në Shën Petersburg, tregon se pavarësisht heqjes nga lista e sanksioneve të BE-së, ajo ende po përballet me vështirësi, si refuzimi i vizës për të udhëtuar në Gjermani për arsye shëndetësore.