Aleanca Demokratike Boshnjake (BDS), si parti politike e boshnjakëve në Maqedoninë e Veriut, do të kandidojë Mersiha Smailoviçin, një aktiviste shumëvjeçare për të drejtat e njeriut dhe të drejtat e grave, në zgjedhjet e ardhshme presidenciale të planifikuara për në prill të këtij viti.
Kandidatura e saj u konfirmua në Shkup, në një konferencë për media, nga kryetari i BDS-së, Munir Kolashinac.
“Për herë të parë në historinë e Maqedonisë, boshnjakët kanë emrin e tyre të pavarur për zgjedhjet presidenciale”, thotë Smailoviç.
“Unë jam një kandidat që do të përfaqësoj dhe do të kërkoj zërin e të gjithë popujve që jetojnë në Maqedoni. Besoj se do të marr shumë përkrahje sepse në publikun maqedonas njihem si aktiviste për të drejtat e njeriut që gjithmonë ka luftuar kundër padrejtësive”.
Kush është Mersiha Smailoviç?
Mersiha Smailović është juriste dhe aktiviste civile, e cila është diplomuar në Universitetin e Shën Kirilit dhe Metodit në Fakultetin Juridik, ndërsa aktualisht po ndjek studimet master në të drejtën ndërkombëtare në të njëjtin universitet. Ajo është përfshirë në disa iniciativa për ndryshimin e ligjeve dhe rregulloreve në vend, transmeton Slobodenpecat.mk.
Ajo është aktiviste e organizatës amerikane “Vital Voices”, e themeluar nga Hillary Clinton, e cila synon edukimin dhe mbështetjen e grave në politikë. Mersiha ka lindur në Shkup, është e martuar dhe nënë e dy vajzave.
Ajo është pronare e kompanisë për shërbime financiare dhe juridike “NAHLA CONSULTING” ku aktualisht ka një angazhim të rregullt pune. Raundi i parë i zgjedhjeve presidenciale në Maqedoninë e Veriut do të mbahet më 24 prill, ndërsa raundi i dytë së bashku me zgjedhjet parlamentare do të mbahet më 8 maj.
Kështu, me këtë kandidaturë, boshnjakët e Maqedonisë godasin fort në ambicie politike, duke i imponuar me figurën e një gruaje edhe me identitet të fortë fetar.
Për shkak të kësaj, ajo mund të marrë shumë vota nga ajo pjesë e popullsisë shqiptare në Maqedoni që ka po të njëjtin identitet të fortë fetar./m.j
