Një aksident i rëndë është shënuar gjatë orëve të natës, në rrugën pranë ish-Turizmit të Ri në qytetin e Kukësit.
Kalimtarë të rastësishëm kanë konstatuar një automjet të dëmtuar rëndë, i cili ishte përplasur me forcë nga mbrapa.
Sipas të dhënave paraprake, mjeti ka qenë i parkuar në momentin e përplasjes, ndërsa goditja ka qenë aq e fuqishme sa e ka zhvendosur disa metra nga vendi fillestar, duke rrëzuar edhe një shtyllë ndriçimi në trotuar.
Automjeti tjetër i përfshirë në aksident është larguar nga vendngjarja dhe aktualisht nuk ka asnjë informacion për identitetin e drejtuesit apo mjetit.
Fatmirësisht, nga përplasja nuk raportohet për të lënduar në njerëz.