Erida Haxhiu është lindur e rritur në Kombinat të Tiranës, por prej 20 vitesh jeton me familjen në Florida, atje ku punon si police. Në “Opinion”, ajo rrëfen peripecitë e fillimit në një vend të huaj dhe se si ia doli të befasonte amerikanët me aftësitë e saj.
-Nga cila zonë e Shqipërisë je larguar?
Erida Haxhiu: Nga Tirana, jam lind e rritur në Kombinat.
-Je lind e rrit në Kombinat dhe je police në Florida?!
Erida Haxhiu: Po!
-Je nga ato policet që vë gjoba apo nuk ke lidhje?
Erida Haxhiu: Varet nga shoferi!
-Në cilin vit u transferuat në Amerikë?
Erida Haxhiu: Gjithë familja, në 2004-ën. Këtë vit bëjmë 20 vjet. Ka kaluar shumë shpejt.
-Në cilin vend të Amerikës u transferuat?
Erida Haxhiu: Në Naples, Florida.
-Ishte i vështirë ambientimi në fillim?
Erida Haxhiu: Vitin e parë vetëm kam qarë.
-Çfarë të mungonte vitin e parë?
Erida Haxhiu: Jeta, çdo gjë! Familja, shoqëria…Isha në gjimnaz, moshë e vështirë.
-Dije anglisht kur shkove?
Erida Haxhiu: Po unë isha e Kolegjit Turk shumë vite dhe kur erdha këtu kisha 5 gjuhë. Isha 16 vjeç dhe nuk iu besua se flisja gjithë këto gjuhë.
-Pra ti ishe e formuar me gjuhët e huaja dhe i befasove amerikanët.
Erida Haxhiu: Po dhe më dhanë punë që 16 vjeç.
Më tej Erida u shpreh se është dashuruar e martuar me një marins me të cilin kanë fëmijë dhe e vizitojnë shpesh Shqipërinë. Madje duke qeshur ajo përshkruan herën e parë që udhëtuan sëbashku në vendin tonë. “Në aeroport dolën të na prisnin nja 7 makina”, përfundoi Erida.
/a.r
