Deri dje, FIFA ishte organizata që administronte futbollin botëror. Sot, gjithnjë e më shumë, rrezikon të shihet si një aset financiar me potencial miliardash.
Sipas një raportimi të Financial Times, presidenti i FIFA-s, Gianni Infantino, po shqyrton krijimin e një strukture të re financiare ku do të transferoheshin aktivitetet ekonomike të organizatës. Më pas, rreth 20% e kësaj strukture do t’u ofrohej investitorëve privatë, duke siguruar rreth 4 miliardë dollarë kapital të ri.
Në pamje të parë, bëhet fjalë për një operacion tipik të financës moderne. Por pas tij fshihet një ndryshim shumë më i madh: për herë të parë në histori, organizata që drejton futbollin botëror do t’i hapte derën kapitalit privat, duke e afruar FIFA-n me modelin e korporatave globale.
Në qendër të negociatave, sipas Financial Times, ndodhet Joshua Kushner, themelues i fondit Thrive Capital dhe një nga emrat më të njohur të kapitalit sipërmarrës amerikan. Ai është vëllai i Jared Kushner, dhëndrit të presidentit amerikan Donald Trump dhe një prej njerëzve më me ndikim në administratën e tij. Zyrtarisht, Joshua Kushner është një investitor privat. Megjithatë, lidhja familjare me një nga figurat më të afërta të Trump e bën të pamundur shmangien e pyetjeve mbi ndikimin politik që mund të shoqërojë një marrëveshje të tillë.
Koha kur del ky plan nuk kalon pa u vënë re. Vetëm pak javë pas Botërorit të Klubeve në SHBA, ku marrëdhëniet mes Infantinos dhe Trump u shfaqën më të afërta se kurrë, del në skenë një projekt që mund të sjellë në FIFA investitorë të lidhur me të njëjtin rreth politik dhe ekonomik.
Përkrahësit e planit argumentojnë se kapitali privat do t’i japë FIFA-s burime të reja për të zgjeruar turnetë, për të investuar në tregje të reja dhe për të rritur të ardhurat. Në sport, hyrja e fondeve private nuk është më një risi. La Liga spanjolle ka bashkëpunuar me fondin CVC, ndërsa Serie A po shqyrton modele të ngjashme për të drejtat televizive ndërkombëtare.
Një tjetër pikëpyetje lidhet me qeverisjen. Kur kapitali privat hyn në një organizatë të këtij niveli, ai nuk kërkon vetëm kthim financiar; zakonisht kërkon edhe ndikim mbi strategjinë, prioritetet dhe vendimmarrjen. Edhe nëse FIFA ruan kontrollin formal, prania e investitorëve mund të ndryshojë mënyrën se si projektohet e ardhmja e futbollit botëror.
Për Gianni Infantinon, një injeksion prej miliarda dollarësh do të përforconte më tej pozitat e tij dhe projektet për zgjerimin e kompeticioneve globale, në një kohë kur ai synon një mandat të ri në krye të FIFA-s. Për kritikët, megjithatë, ky është hapi më i madh drejt shndërrimit të futbollit në një produkt financiar, ku vlera e lojës matet gjithnjë e më shumë me interesin e tregjeve dhe jo me interesin e sportit.
Nëse raportimi i Financial Times konfirmohet, nuk do të jetë thjesht një marrëveshje financiare. Do të jetë një moment historik, që mund të ndryshojë përgjithmonë mënyrën se si qeveriset sporti më i ndjekur në botë. Sepse pyetja nuk është vetëm nëse FIFA do të marrë miliarda dollarë. Pyetja është nëse futbolli po hyn në një epokë ku vendimet nuk do të diktohen më vetëm nga loja, por edhe nga kapitali.