Izraeli kreu gjatë natës së kaluar një sulm me raketa ndaj qytetit Nabatieh në Libanin jugor duke vrarë një person dhe duke plagosur 11 të tjerë. Në fokus të sulmit ka qenë me gjasë ndonjë bazë e Huthis, grupit paramilitar të mbështetur nga Irani. Nuk vonoi dhe drejt territorit izraelit u lëshuan disa raketa, por që sipas autoriteteve të Tel Avivit u neutralizuan me sukses në ajër.
Armëpushimi me Izraelin duket se i ka shërbyer Iranit të kryejë ceremonitë mortore të zyrtarëve të lartë të vrarë gjatë luftës 12 ditore. Arkivolet e mbuluar me flamurin iranian, me portrete të komandantëve të vrarë, u shoqëruan nga turma të mëdha në Teheranin qendror.
Mes viktimave ishte edhe Mohammad Bagheri, oficeri më i lartë ushtarak në Iran si shefi i shtabit të forcave të armatosura të vendit. Tensioni megjithatë është rritur në Iran pasi një ditë më parë presidenti amerikan Donald Trump tha se mund ta konsideronte një tjetër sulm ndaj Iranit nëse vendi vijonte pasurimin e uraniumit.
Trump tha se e dinte ku fshihej Khamenei, por e kishte shpëtuar nga një vdekje e shëmtuar dhe e turpshme. Trump hodhi poshtë edhe lajmet se administrata e tij kishte diskutuar mundësinë e një ndihme ndaj Iranit prej 30 miliardë dollarësh për të ndërtuar një program bërthamor që prodhon energji për përdorim civil.