Kryeqyteti është tronditur mëngjesin e sotëm (27 qershor) nga dy tërmete me intensitet 4 ballë me epiqendër Fushë-Krujën.
Lëkundjet janë ndier në një distancë të shkurtër prej disa minutash. Ato duket se shkaktuan panik edhe tek banorët e kryeqytetit, të cilët i frikësohen mundësisë së pasgoditjeve të tjera.
Sizmologu Edmond Dushi ka sqaruar se tërmetet kanë zgjatur disa sekonda dhe se janë regjistruar edhe nga një tërmet i tretë me intensitet më të vogël.
“Për këto dy tërmete kemi edhe një mikrotërmet, 2,4, mbas tyre, shumë afër në kohë. Ndërkohë që flasim mund të jetë shtuar numri dhe këtë do ta shohim në orët në vijim,” shpjegon Dr. Dushi.
Lëkundjet sizmike u ndjenë në kryeqytet, por edhe në zonat përreth Fushë-Krujës.
“Ndjeshmëria është më e madhe, sepse natyrisht thellësia i favorizon këto. Janë tërmete mbi 10 km të thellë, që nënkupton se do të kemi një ndjeshmëri pak më të lartë në zonat përreth. Kur dy tërmetet mbivendosen do të thotë që valët e të parit akoma nuk janë shuar kur fillojnë valët e të dytit. Kjo reflektohet në një zgjatshmëri,” thotë sizmologu.
Tri ditë më parë, më 24 qershor, një tërmet prej 4.4 ballësh goditi vendin në orën 5 të mëngjesit. Epiqendra ishte 16 kilometra në veriperëndim të Tiranës dhe 12 kilometra në jugperëndim të Krujës.