Pankartat janë kthyer në një nga elementët më të spikatur të protestës së nëntë qytetare para Kryeministrisë, ku qindra protestues kanë zgjedhur të shprehin pakënaqësitë e tyre përmes humorit, ironisë dhe mesazheve politike.
Mes turmës së përbërë nga fëmijë, të rinj, gra dhe burra, nuk munguan pankartat kreative që tërhoqën vëmendjen e pjesëmarrësve dhe kalimtarëve.
Një prej tyre ironizonte kryeministrin Edi Rama me mbishkrimin: “Çfarë porosit në Temu dhe çfarë të vjen”, duke e krahasuar atë me ish-kryeministrin Fatos Nano.
Një tjetër pankartë, e mbajtur nga një fëmijë, përcillte mesazhin: “O Zaho, na mbyti betoni, thuaji babit mjaft”, duke iu referuar ndërtimeve dhe betonizimit.
Ironia vijoi edhe me pankartën: “Dele, më ndiqni për më shumë projekte shkatërrimtare”, një referencë ndaj deklaratave të mëparshme të kryeministrit për influencerët dhe rrjetet sociale.
Mes pankartave që tërhoqën vëmendjen ishte edhe ajo me fotografinë e Ramës dhe mbishkrimin: “Psikiatria është nga ana tjetër”.
Një protestues tjetër kishte zgjedhur të rikthente në vëmendje një deklaratë të artistit Kastro Zizo, duke mbajtur pankartën: “Jep dorëheqjen ose ik, idiot”.
Po ashtu, një tjetër mesazh me nota ironike shkruante: “Çunat e 313-ës, prisni influenceren e re se po vjen”.
Nuk munguan as pankartat me mesazhe politike dhe kombëtare. Një prej protestuesve mbante një banderolë ku shkruhej: “Me Vuçiçin je vëlla, Drinin mos ma prek. Dibra është dhuratë e Zotit, vendlindja e Kastriotit. Rama ik!”
Përmes këtyre pankartave, protestuesit kanë zgjedhur të përcjellin kundërshtimin ndaj qeverisë dhe projektit të Zvërnecit, duke përdorur satirën dhe ironinë si formë reagimi publik.
