Drejtori i CIA-s, John Ratcliffe, u tha ligjvënësve amerikanë se sulmet e fundit ushtarake të SHBA-ve i kanë dhënë një goditje të rëndë programit bërthamor të Iranit. Sipas tij, ato shkatërruan të vetmen qendër të konvertimit të metaleve të vendit, raportoi agjencia Associated Press, duke cituar një zyrtar amerikan.
Zyrtari, i cili foli në kushte anonimiteti për shkak të ndjeshmërisë së informacionit, sqaroi se Ratcliffe gjatë një seance të klasifikuar javën e kaluar e përshkroi këtë operacion si një pengesë madhore për Iranin, nga e cila do t’i duhen vite për t’u rikuperuar.
Sipas tij, Ratcliffe informoi gjithashtu se shumica e rezervave të Iranit me uranium të pasuruar ndodhet ende e varrosur nën rrënojat e objekteve bërthamore në Isfahan dhe Fordoë, dy nga tre objektet kryesore të goditura nga sulmet amerikane.
Edhe pse uraniumi mund të jetë ende i paprekur, zyrtari theksoi se shkatërrimi i qendrës së konvertimit të metaleve i ka lënë Iranit një boshllëk kritik në përpjekjet për ndërtimin e një arme bërthamore.
Presidenti Donald Trump ka vazhduar ta mbrojë operacionin, i cili u zhvillua pak para se të hynte në fuqi armëpushimi mes Izraelit dhe Iranit, të martën e kaluar.
“Ishte shkatërruese si kurrë më parë”, tha Trump në një intervistë për Fox Neës
Megjithatë, një raport paraprak i Agjencisë së Inteligjencës së Mbrojtjes (DIA) konkludoi se sulmet shkaktuan dëme të konsiderueshme, por nuk e shkatërruan plotësisht infrastrukturën në Fordoë, Natanz dhe Isfahan.
Drejtori i Përgjithshëm i Agjencisë Ndërkombëtare për Energjinë Atomike (IAEA), Rafael Grossi, tha në emisionin “Face the Nation” të CBS-së se tre objekte kryesore bërthamore iraniane, me kapacitete për përpunim, konvertim dhe pasurim të uraniumit, janë dëmtuar në një shkallë të rëndësishme.
Por ai paralajmëroi se dëmet nuk duhen ekzagjeruar.
“Disa pjesë janë ende në këmbë,” tha Grossi, duke shtuar se “nëse ata duan, mund ta rinisin sërish këtë aktivitet.”
Ai theksoi se inspektorët ndërkombëtarë duhet të lejohen të hyjnë në objektet bërthamore për të vlerësuar plotësisht dëmet.
Qendra e konvertimit të metaleve, e shkatërruar në kompleksin bërthamor të Isfahanit, kishte një rol thelbësor në zhvillimin e armëve bërthamore nga Irani. Ajo kishte si funksion shndërrimin e gazit të uraniumit të pasuruar në metal të dendur, një hap vendimtar për ndërtimin e bërthamës shpërthyese të një bombe atomike. Gjatë dëshmisë së tij të klasifikuar, Ratcliffe e përshkroi eliminimin e kësaj qendre si një fitore strategjike që pengon në mënyrë serioze aftësinë e Iranit për të armatosur uraniumin.
Ratcliffe i tha gjithashtu ligjvënësve se ofensiva 12-ditore e SHBA-ve ka dobësuar rëndë sistemet e mbrojtjes ajrore të Iranit. Sipas zyrtarit amerikan, drejtori i CIA-s shpjegoi se tashmë Irani nuk ka më aftësinë për t’u mbrojtur nga sulmet ajrore të mundshme izraelite, duke e bërë çdo përpjekje për rindërtimin e programit bërthamor jashtëzakonisht të rrezikshme.