Me fillimin e vitit të ri shkollor, rikthehet në vëmendje shëndeti i sistemit muskulor-skeletor të fëmijëve. Specialistët e shëndetësisë dhe fizioterapisë në Greqi shprehen se mbrojtja e kurrizit të nxënësve nuk kërkon panik apo rregulla strikte statike, por zbatimin e disa zakoneve të thjeshta e praktike të përditshme.
Shqetësimi kryesor i prindërve mbetet pesha e rëndë e çantave dhe ndikimi i saj te postura e fëmijës. Megjithatë, ekspertët rrëzojnë një nga mitet më të përhapura: çanta e rëndë e shkollës nuk shkakton skoliozë apo deformime të përhershme të shtyllës kurrizore. Pavarësisht kësaj, një ngarkesë e tepërt ose përdorimi i gabuar i saj mund të shkaktojë dhimbje muskulore, lodhje dhe diskomfort në shpinë, qafë dhe krahë.
Ndryshe nga besimi i përhapur se ekziston një “qëndrim i përsosur” që duhet ruajtur gjatë orëve të mësimit, specialistët theksojnë se pozicioni më i mirë trupor është ai që ndryshon shpesh. Lëvizja e vazhdueshme dhe shmangia e qëndrimit me orë të tëra pa lëvizur janë çelësi i shëndetit të shtyllës kurrizore.
5 hapat për mbrojtjen e shëndetit të fëmijëve
Menaxhimi i peshës: Çanta duhet të përmbajë vetëm materialet e nevojshme për ditën. Si rregull i përgjithshëm, pesha e çantës rekomandohet të jetë midis 10% deri në 15% të peshës trupore të fëmijës. Nëse nxënësi anoni përpara gjatë ecjes ose ankohet për dhimbje, ngarkesa duhet reduktuar menjëherë.
Përzgjedhja e duhur e çantës: Çantat me rrota janë një opsion mjaft i mirë kur rruga është e rrafshët dhe pa shkallë. Në rastin e çantave klasike të shpinës, ato duhet të mbarten me të dy rripat në krahë, të jenë të shtrënguara afër trupit dhe sendet më të rënda të vendosen sa më afër shpinës. Mbajtja e çantës vetëm në njërin krah duhet shmangur.
Ergonomia në bankë dhe shtëpi: Qëndrimi në tavolinë nuk duhet të jetë “ushtarak” apo i ngurtë. Shpina duhet të ketë mbështetje, krahët të jenë të relaksuar dhe shputat e këmbëve të prekin dyshemenë. Gjatë studimit në shtëpi rekomandohen pauza të shkurtra çdo orë.
Kujdesi nga ekranet: Përdorimi i zgjatur i telefonave, tabletëve apo laptopëve nxit përkuljen e qafës poshtë. Ekranet duhet të vendosen sa më afër lartësisë së syve, duke shmangur përdorimin e tyre mbi gjunjë për periudha të gjata.
Aktiviteti fizik gjatë pushimeve: Pushimi shkollor nuk duhet të kalojë në mënyrë pasive. Rekomandimet ndërkombëtare udhëzojnë se fëmijët e moshës 5-17 vjeç duhet të kryejnë mesatarisht 60 minuta në ditë aktivitet fizik.
Nëse fëmija shfaq dhimbje të vazhdueshme ose të përsëritura në shpinë, qafë apo gjymtyrë që pengojnë aktivitetin e tij të përditshëm, prindërit duhet të kërkojnë vlerësim profesional nga një fizioterapist ose mjek specialist për të marrë udhëzime të personalizuara.