Kryeministri Edi Rama ka thyer heshtjen për raportin e tij me Ergys Agasin, pas arrestimit të këtij të fundit pak javë më parë.
Ashtu sikundër pritej, Rama tentoi të lajë duart me të, edhe pse e përdori për shumë vite si koordinator të krimit me qeverinë. Agasi ishte ai që bënte ligjin në administratë edhe pse nuk kishte asnjë lloj funksioni. Ishte ai që përcaktonte kush merrte tenderë dhe kush jo dhe po ashtu ishte ai që duke shërbyer si koordinator i krimit të bënte miliarda.
Rama, ashtu siç ka bërë me të gjithë bensikët e tij, e shiti dhe Gysin duke thënë se marrëdhëniet personale apo fotografitë me persona të ndryshëm nuk përbëjnë funksion publik dhe nuk u japin atyre të drejtën të flasin apo të veprojnë në emër të tij.
“Mua më kanë bërë shumë afërsi ose shumë rrëfenja me afërsitë. Afërsia me mua, me një njeri apo tjetrin, nuk është në funksion publik. As fotografia, as raportet personale dhe as pretendimi që flasin në emrin tim. Unë nuk kam autorizuar ndonjëherë njeri të flasë në emrin tim. Unë nuk kam autorizuar njeri të bëjë punët e shtetit në emrin tim. Patjetër që mua më vjen keq kur gjendem në situatën kur dikush, me të cilin kam pasur një marrëdhënie njerëzore, për një arsye a tjetër, ekspozohet si një njeri që ka probleme me ligjin. Por ama, nga ana tjetër, jam krejtësisht i çliruar dhe pa asnjë problem, përtej keqardhjes, edhe për veten në një farë mënyre, sepse secili atje është përballë ligjit me veten dhe avokatët e vet”, tha Rama gjatë intervistës me Rudina Xhungën.
I pyetur se përse nuk reagon kur persona të tillë dihet që flasin në emër të tij, Rama përsëriti se nuk ka autorizuar asnjëherë askënd të flasë apo të bëjë punët e shtetit në emrin e tij dhe se nuk mund të merrej me të gjithë ata që e pretendojnë një gjë të tillë, duke larë një herë e mirë duart me marrëdhënien e tij me Agasin.
“Në emrin tim kush nuk flet. T’i hysh kësaj: “Pse fole në emrin tim?”, i bie të mos bësh asnjë punë tjetër. Unë mendoj që njerëzit që më njohin e dinë që në emrin tim nuk flet dot njeri. Ata që nuk më njohin dhe mendojnë se të tjerë flasin në emrin tim, më vjen keq për ta. Por të gjithë duhet ta dinë se në emrin tim unë flas vetë”, përfundoi Rama.