Ndërsa Presidenti amerikan Donald Trump kërkon arritjen e një armëpushimi në Gaza, Benjamin Netanyahu intensifikon sulmet.
Forcat izraelite bombarduan një kafene, një shkollë dhe një qendër të shpërndarjes së ndihmave gjatë orëve të fundit, duke vrarë të paktën 95 palestinezë. Të paktën 60 prej tyre ishin viktima të sulmeve që shënjestruan qytetin e Gazës dhe veriun e territorit.
39 persona mbetën të vrarë pas bombardimit të një kafeneje të famshme buzë detit, Al-Baqa, ku zakonisht qëndrojnë të rinj, aktivistë dhe gazetarë për shkak të qasjes që ofron ndaj internetit. Mes viktimave atje është një gazetar, e po ashtu gra e fëmijë që ishin mbledhur në kafene.
Një dëshmitar tha se avionët izraelitë kishin bombarduar lokalin: “Papritur dëgjuam një shpërthim të fortë dhe nisëm të vraponim. Gjetëm kufoma të shpërndara në det. Kjo është një zonë publike ku njerëzit vijnë për të gjetur pak shpëtim. Por, prapë u bë shënjestër sulmesh”.
Bombardimi rrafshoi kafenenë dhe la një krater të madh në tokë. Al Jazeera raporton se sulmi kishte ndodhur pa paralajmërim. Po ashtu, të hënën forcat izraelite goditën edhe një magazinë ku shpërndaheshin ndihmat në lagjen Zitoun të qytetit të Gazës.
Ndërkohë, në Gazën qendrore ushtria sulmoi oborrin e spitalit të Al-Aqsa, ku mijëra familje të shpërngulura kishin gjetur strehim. Në Gazën jugore një sulm izraelit vrau të paktën 15 palestinezë që prisnin për ushqim në qendrat e shpërndarjes së ndihmave, ndërsa 50 të tjerë u plagosën. Sipas raportimeve, të paktën 600 palestinezë kanë mbetur të vrarë ndërsa prisnin për ushqim, që kur SHBA dhe Izraeli morën kontrollin e shpërndarjes së ndihmave.
Paralelisht me bombardimet, Izraeli vijon edhe ofensivën tokësore me tanket që kanë avancuar në zonat lindore të qytetit të Gazës. Intensifikimi i sulmeve vjen teksa zyrtarë izraelitë kanë udhëtuar në Uashington për bisedime lidhur me një armëpushim të mundshëm. Mes trysnisë në rritje për t’i dhënë fund luftës, kryeministri Netanyahu pritet të mbledhë së shpejti kabinetin e sigurisë për të përcaktuar hapat e radhës në Gaza.
