Kryeministri Edi Rama ironizoi dje influencerët në rrjetet sociale, duke u shprehur se ata përdorin protestën si arsye për të reklamuar punën e tyre. Rama foli edhe për një blogere, e cila del në foto te kulla Eiffel e gjatë sa tre herë ai.
“Më tregonte një nga ato punonjësit e rinj, ishte njëra te kulla Eiffel dhe kishte bërë një foto kështu dhe dukej 3 herë më e gjatë se unë, aq sa kur e pashë thashë po më bie për sipër. Thoshte shyqyr u hap koha në Paris. Natyrisht nëse ti i ke mundësitë të shkosh sa në Paris dhe sa në Dubai, ti nuk ke pse i thua shqiptarëve atje e dua komplet të virgjër bregun e detit, dua rërën, flamingot dhe pemët, se atje do dal me bikini dhe do dal në profil me atë fijën e vogël. Hë hë hë, dhe ja ecin kështu dhe ato e shohin thonë ishalla po i këputet lidhësja dhe ta shohim tamam flamingon“, tha Rama.
Pas këtyre mesazheve ironizuese të Ramës ka reaguar ish banorja e BBV dhe influencerja Dea Mishel, e cila u bë e famshme për talljen e turpshme që ka bërë ndaj fëmijëve jetimë. Edhe pse Rama nuk lakoi emra konkretë, Dea Mishel i ka drejtuar disa pyetje kryeministrit, duke theksuar se ‘është budallaqe dhe se nuk kupton’.
Kur ishte në BBV, Dea Mishel mbajti një fjalim për të ndjerin Pal Koka, roja i sigurisë që u vra gjatë sulmit me armë drejt Top Channel. Por, në vend që të thoshte ‘shprehim ngushëllimet’, Dea Mishel tha ‘i urojmë ngushëllime’ familjes. Më herët, në një sfidë, ajo tha se ka dalë me rezultate të shkëlqyera në shkollë, por bëri gabimin e rëndë me ditëlindjen e Skënderbeut, që sipas saj lindi në 1956 kur në fakt, heroi ynë kombëtar, ka lindur në 1405.
Mes blogereve dhe influencereve që i janë bashkuar protestës dhe që kërkojnë dorëheqjen e Ramës është edhe ish-banorja e “BBV”, influencierja Rizarta Hoxha. Në shtator të vitit të kaluar, Rizarta është bërë pjesë e rubrikës “Rrethi katror” në “E Diell” me personazhe si Alfred Çako, Bledi Mane dhe Ed Manushi.
E pyetur nga gazetari Bledi Mane se cili është Presidenti i Shqipërisë, ajo i është përgjigjur se është “Ilir Meta, që është në burg”. Një përgjigje që të gjithë u munduan t’a shmangnin duke mos e vendosur vajzën më shumë në siklet, por një gafë e tillë nuk mund të mos bëhej virale në rrjete sociale. Niveli i kësaj influencereje i është bashkuar protestës si trend, madje flet edhe politikisht nëpër studio televizive, me sa duket për të shtuar ndjekësit dhe klikimet që përkthehen në të ardhura.
