Kreu i grupit parlamentar të Partisë Socialiste Taulant Balla ka dëshmuar këtë të enjte në Gjykatën e Posaçme kundër Korrupsionit dhe Krimit të Organizuar (GJKKO), si i pari dëshmitar në gjyqin për çështjen ‘Partizani’. Ai dha shpjegimet e tij se ku i ka marrë indiciet e t ij për të bërë kallëzimin lidhur me çështjen e privatizimit të kompleksit sportiv ‘Partizani’.
Në një prononcim për mediat jashtë Gjykatës së Posaçme, Balla tha se shpreson që ky proces të jetë i drejtë ndërsa ka theksuar se i qëndron deklarimeve që ka bërë në kallëzimin e vitit 2020.
“Unë jua thashë qëkur erdha. Që fakti që në bankën e të akuzuarve ka persona që këto 35 vite kanë qeverisur vendin dhe akuzohen për korrupsion e fshehje pasurie është lajm i mirë për të gjithë shqiptarët. Unë uroj që procesi të jetë i drejtë dhe përgjegjësia penale të shkojë te gjithkush nga personat të cilët i kanë këto përgjegjësi. Kujtoj këtu, që unë nuk jam një nga ata persona që bëjnë kallëzim me emër tjetër. Kam vënë emrin tim në fund të atij kallëzimi dhe i kam qëndruar përgjatë gjithë deklarimeve të mia atij kallëzimi penal të bërë në nëntor të vitit 2020. Sot jemi pas 6 vitesh. Ka një shprehje të bukur: Drejtësia vonon, por nuk harron! Dhe e vërteta është se privatizimi i kompleksit sportiv Partizani, që mund të ishte në dobi të të rinjve të Tiranës, sot është kthyer në 17 kulla që kanë prodhuar pasuri”, tha Balla.
Më tej ai ka shtuar se shpreson të thirret si dëshmitar dhe për hetimin mbi çështjen e “21 Janarit”.
“Uroj që në ditët dhe muajt në vijim të jem këtu për një kallëzim tjetër, që është kallëzimi për 21 janarin. Ju e dini fare mirë që prej 21 marsit 2011, kur kam depozituar kallëzimin e parë edhe më pas, edhe familjarët e të vrarëve të 21 Janarit e kujtoj këtu familjen Nika, ka një vendim të Gjykatës së Lartë dhe të Strasburgut dhe një regjistrim nga prokuroria e posaçme,” u shpreh deputeti socialist.
Sjellim ndërmend se përveç Ballës, të pranishëm në sallën e gjyqit, ishin edhe dy nga të pandehurit, dhëndri i ish-kryeministrit Sali Berisha, Jamarbër Malltezi, si dhe Xhimi Begeja.
