Pak më shumë se një javë më parë, TikTok mbërriti zyrtarisht në Shtetet e Bashkuara si “qytetar i natyralizuar”. Që nga ai moment, aplikacioni i videove po lufton për mbijetesë.
Kalimi dramatik i TikTok-ut nisi më 22 janar, kur kompania kineze ByteDance finalizoi shitjen e aplikacionit te një grup investitorësh amerikanë, mes tyre edhe gjiganti i softuerëve Oracle. Gjatë periudhës nën pronësi kineze, TikTok njohu një rritje marramendëse, duke kaluar 1 miliard përdorues dhe duke lënë konkurrentë si Instagram të duken të vjetëruar. Por jeta e re e TikTok-ut në SHBA ka nisur keq.
Një ditë pas kalimit të pronësisë, drejtuesit e rinj ndryshuan politikën e privatësisë, duke lejuar mbledhje më të gjerë të të dhënave, përfshirë edhe gjurmimin e saktë të vendndodhjes së përdoruesve. Ndryshimi ngjalli dyshime, jo aq për përmbajtjen, sa për qëllimet e pronarëve të rinj, mes tyre miliarderi Larry Ellison, pronar i Oracle dhe donator i njohur i lëvizjes Maga. Këto dyshime do të shndërroheshin shpejt në paranojë.
Fundjava pas transferimit të pronësisë përkoi me dy ngjarje madhore në SHBA: Një stuhi e fortë bore dhe të ftohti ekstrem që vuri në alarm rreth 230 milionë njerëz, si dhe vrasja e një qytetari amerikan 37-vjeçar në Minneapolis nga oficerë federalë të emigracionit gjatë një proteste, një ngjarje që shkaktoi zemërim të madh publik. Të dyja do ta godisnin TikTok-un, secila në mënyrën e vet.
Stuhia dimërore Fern dëmtoi disa qendra të të dhënave të Oracle, nga të cilat varet TikTok-u, diçka që kompania nuk e bëri publike fillimisht. Si pasojë, aplikacioni pati ndërprerje serioze. Shumë përdorues raportuan se nuk mund të ngarkonin video, ndërsa të tjerë se videot e tyre merrnin zero shikime, pavarësisht ndjekësve të shumtë.
Në të njëjtën kohë, figura publike po përpiqeshin të përdornin TikTok-un për të shprehur zemërimin për vrasjen e Alex Pretti nga agjentë të patrullës kufitare. Ata thanë se videot nuk postoheshin ose nuk merrnin shikime. Si reagim, shumë përdorues të njohur, mes tyre senatori i Kalifornisë Scott Weiner, këngëtarja Billie Eilish me vëllain e saj dhe komediania Meg Stalter,akuzuan TikTok-un për censurë të përmbajtjeve kritike ndaj agjentëve federalë të emigracionit. Stalter njoftoi se do të fshinte llogarinë e saj me rreth 280 mijë ndjekës.
Akuzat u pasqyruan gjerësisht nga media të mëdha si New York Times, CNN, Washington Post dhe të tjera. Revista Cosmopolitan pyeti hapur: “A po censuron TikTok përmbajtjen kundër ICE?”. Senatori demokrat Chris Murphy e quajti censurën e dyshuar një “kërcënim për demokracinë”.
Pas disa ditësh reagimesh të forta, TikTok deklaroi më 26 janar se problemet ishin shkaktuar nga bora, akulli dhe i ftohti ekstrem. Oracle sqaroi më tej se një qendër e të dhënave kishte pësuar një ndërprerje të përkohshme të energjisë për shkak të motit. Edhe pse rrallë, ngjarje të tilla fizike mund të prekin shërbime të mëdha digjitale.
Megjithatë, polemikat nuk u shuan. Guvernatori i Kalifornisë, Gavin Newsom, njoftoi se zyra e tij do të hetonte nëse TikTok kishte censuruar video kritike ndaj Donald Trump, duke zgjeruar akuzat për ndërhyrje pro-Maga.
Mosbesimi i publikut u rrit dhe shumë përdorues deklaruan se po largoheshin nga TikTok-u “amerikan”. Kjo solli rritjen e një aplikacioni të ri konkurrent, Upscrolled, i cili premton më pak censurë dhe u ngjit në krye të shkarkimeve në App Store në SHBA. Ndërkohë, TikTok ra në vendet e dyta dhe të treta në listat e shkarkimeve, ndërsa në top 10 hynë edhe disa aplikacione VPN, shenjë e frikës nga mbikëqyrja digjitale.
Me mbi 1 miliard përdorues në mbarë botën, TikTok vështirë se do të zhduket. Por java e parë nën pronësi amerikane ka dëmtuar rëndë besimin e përdoruesve dhe një tjetër gabim mund të ketë pasoja afatgjata për të ardhmen e platformës.